20 ons Salvamaint alpin i’l Grischun

Di e not e quai dürant 24 uras stan las commembras ed ils commembers dal Salvamaint alpin dal Grischun a disposiziun in cas d’accidaints o da retscherchas illas muntognas dal chantun. Da quels 1200 persunas surmanzunadas fan part daspö l’on 2020 eir 400 commembers da prüm agüd «first responders+» al Salvamaint alpin grischun. Alice Vollenweider presidiescha daspö il mais mai 2024 quist’organisaziun. Ella abita a Sent e lavura sco veterinaria in Engiadina. Sco alpinista e chatschadra esa per ella «üna gronda motivaziun da pudair manar üna tala organisaziun».

Cun festa da giubileum a Puntraschigna

Dürant ils ultims 20 ons es l’organisaziun gnüda digitalisada dal tuottafat. Plü bod as staiva tuot organisar cul telefon, hoz funcziuna quai tuot ün ün’app in collavuraziun culla Pulizia chantunal e la Rega. Ils 15 da november 2025 ha lö la festa da giubileum a Puntraschigna, ingio cha’ls commembers da la Rega, dal Salvamaint alpin svizzer ed eir da l’Uffizi da sandà dal Grischun saran preschaints.

Il Salvamaint alpin dal Grischun

La società regiunala «Salvamaint alpin» dal Grischun cumpiglia l’inter territori chantunal. Commembras sun las secziuns dal Clup Alpin Svizzer (CAS): CAS Arosa, CAS Bellinzona, CAS Bernina, CAS Bregaglia, CAS Tavau, CAS Engiadina Bassa, CAS Piz Platta, CAS Partenz, CAS Rezia, CAS Terri. Ella dispuona da 27 staziuns da salvamaint. Il «salvamaint alpin» vain finanzià cun contribuziuns d’instituziuns publicas sco cumüns e chantuns, contribuziuns als cuosts da gestiun tras las organisaziuns da fundaziuns, scuntradas directas d’acziuns sco er donaziuns, iertas u legats.