In santeri digital

Sch’el ma sumeglia u betg, quai è grev da dir. Ma la fotografia tar quest artitgel mussa mes tat: Hans Truttmann-Brand da Seelisberg (1899–1972). El è mort anc avant che jau sun naschì. Jau l’enconusch pia mo da raquints e da fotografias. E questa fotografia è accessibla publicamain sin la plattafurma «portraitarchiv.ch». Dacurt, durant la palorma suenter in funeral, discurrind da la parentella, m’ha ina cusrina rendì attent a la fotografia da noss tat sin quest portal. Anc autra parentella trapassada avain nus lura chattà sin «portraitarchiv.ch».

Quai che para a prima vista in pau macaber – in santeri digital – è in grond project svizzer da fans da la genealogia. Ellas ed els rimnan e publitgeschan per uschedir «cartas da morts». E sper las fotografias cuntegna il portal – sco per exempel tar mes tat – er anc il di da naschientscha, il di da la mort, sia professiun (pur) e perfin si’adressa. Ma co statti cun la protecziun da datas? – Ils responsabels dal portal sincereschan da digitalisar mo datas ch’èn gia stadas publitgadas, per exempel en annunzias da mort.

L’entir project dal «portraitarchiv.ch» vegn purtà da la «Zentralschweizerische Gesellschaft für Familienforschung», damai dad in’uniun per genealogia da la Svizra Centrala. Il portal crescha ad in crescher dapi ch’el è vegnì lantschà l’onn 2011. Mintgina e mintgin po sa participar e contribuir fotografias ed indicaziuns. En il fratemp cuntegna la pagina digitala passa 400 000 persunas trapassadas da l’entira Svizra, pia er dal Grischun. E tgi che crai che quai saja plitost ina chaussa da vitgs e vals catolicas, quel sbaglia! – Però il meglier èsi da simplamain svutrar sez ina giada en «portraitarchiv.ch» e da render uschia in mument onur als perdavants.