Cultura da baghegiar persistenta

Biros d’architectura e mistergners dalla Surselva dattan envesta en lur lavur, muossan exempels e presentan la passiun e visiun per la moda e maniera da baghegiar persistenta.

Surselva LAB, ina partiziun dalla Scol’aulta specialisada dil Grischun (SASGR), organisescha la retscha da sentupadas. Sco quei ch’ella communichescha, ha quella cultura da baghegiar ina liunga tradiziun en Surselva. L’emprema occurrenza ei sonda suentermiezgi, ils 15 da november 2025, allas 13.00. Il biro d’architectura Capaul & Blumenthal vegn a presentar el Cinema Sil Plaz sia lavur cun arschella ed exempels d’objects realisai cun quei material. La sonda sisu, ils 22 da november, suonda a Trun la secunda sentupada. Egl Atelier Schmidt, sigl areal dall’anteriura fabrica da ponn, san ins s’informar davart il baghegiar cun strom e ballas da strom. Era quell’occurrenza entscheiva allas 13.00. La tiarza sentupada cun material da baghegiar alternativ e persistent ei sonda, ils 29 da november 2025. Allas 13.00 entscheiva quella el tschalèr da glatsch a Glion. Participontas e participonts han caschun d’emprender d’enconuscher maulta e colurs da caltschina, las pusseivladads da duvrar quei material e sias qualitads persistentas. Allas sentupadas e guidadas las treis sondas els treis loghens ein buca mo specialistas e specialists dalla branscha, mobein ina e scadin envidai.