Wow, l’antropologia!

Chi cugnuoscha propi l’antropologia? – Be pochs! – Eau la d’he scuvierta avaunt qualche temp, cur ch’eau d’he fat ün an sabatic e sun turneda a stüdger a l’universited. Que es sto l’an 2016, e vairamaing nu savaiva dret che fer.

Alura d’heja cumanzo a guarder ün po las prelecziuns cha’ls differents departamaints proponivan, sun ida a discuorrer cun qualche professur e cur ch’eau d’he inscuntro il docent d’antropologia culturela chi am ho quinto da sias retscherchas cun pövels indigens in Asia ed in America d’heja inclet cha l’antropologia pudess esser üna vaira scuvierta!

Düraunt sias lecziuns ans ho alura il professur spiego cha l’antropologia culturela stüdgia populaziuns chi sun profuondamaing diversas, chi vivan in maniera differenta, cun diversas üsaunzas, crettas e möds da penser. Ella fo que cun il böt da pruver d’incler ils trats cumünaivels traunter tuot ils umauns, eir quels pü divers. Dimena, a vo per incler las caracteristicas cha chattains dapertuot sül muond, saja que tar pövels indigens chi vivan culla natüra per exaimpel aint ils gods da l’Amazonas, saja que tar persunas chi vivan in üna granda cited occidentela scu Turich.

A la fin prouva l’antropologia culturela da respuonder a la dumanda: Che es ün esser umaun essenzielmaing? E che parts da nus sun in vardet «construidas» da la cultura? – Che interessant!

L’antropologia güda dimena d’incler la diversited culturela, reveland cu cha las crettas e las normas socielas paun varier considerabelmaing traunter las differentas societeds e cumünaunzas – e cu cha l’ambiaint culturel fuorma nos fer e penser. L’antropologia ans muossa cha que nun exista be üna vardet u ün unic möd da vzair il muond, ma bain üna multifarieted da perspectivas. Ella metta a la prouva nossa concepziun dal «normel», ans incuraschand d’explorer e da celebrer la diversited da las culturas umaunas.

Il term antropologia deriva dal rest dal grec e cumbina «ànthropos» chi significha «umaun, umanited» cun il pled «lògos» chi significha «stüdi». A vo per il stüdi da l’umanited.

Eau invid a tuottas e tuots d’explorer l’antropologia, magari fascinescha que eir a vus!

Giulia Romano, mez Engiadinaisa e mez Siciliana, viva dapi 20 onns en Toscana. Ella lavura sco freelance cun interpresas che s’engaschan per il svilup persistent da l’ambient e la societad.