Ina tiasta da péz da varga 21 kilos
Cun ina tiasta da péz da 21,77 kilos ei Giusep Cajacob da Sumvitg daventaus victur dalla sisavla occurrenza da tiastas da péz da Sumvitg e contuorn. La davosa sonda sera ha giu liug la rangaziun ell’Ustria Miraval a Sogn Benedetg.
Il victur dalla concurrenza da tiastas da péz Giusep Cajacob ha detg enviers la FMR che sia tiasta da pèz hagi atgnamein gudignau e buc el. «Jeu saiel buca dir daco che quella tiasta ei vegnida aschi gronda. Jeu supponel che quei hagi in motiv genetic ella famiglia da quellas tiastas ch’ein vengidas semnadas ensemen cun la mia. En scadin cass haiel jeu fatg nuot auter che dau aua e dau grascha e finiu.»
Igl ei mai prevesibel
Igl elevatur dallas plontinas ei il hortulan Vitus Bass da Sogn Benedetg. El emposta e lai crescher las plontinas mintgamai entochen l’entschatta dalla stad e lu survegnan las participontas ed ils participonts las tiastas per schar crescher quellas vinavon egl agen iert. Giusep Cajacob ha insumma buca sminau che sia tiasta vegni aschi gronda e peisi quest’atun varga 21 kilos. «Aschi ina gronda tiasta haiel jeu aunc maina giu en quels treis onns ch’jeu sundel separticipaus. Mia motivaziun da separticipar ei principalmein quella da sustener igl iniziant dall’occurrenza Vitus Bass che fa fetg gronda lavur cullas tiastas da péz igl emprem temps.»
35 clients
Vitus Bass da Sogn Benedetg cultivescha gia dapi onns tiastas da péz en siu iert. «Jeu haiel ver 35 hortulans da hobi che vegnan tier mei per plontinas da tiastas da péz per schar crescher vinavon quellas en lur agen iert. Las biaras ed ils biars prendien lu part dalla occurrenza da tiastas da péz.» Avon sis onns seigi l’idea da far quella occurrenza naschida. «Dapi lu fagein nus quei mintg’onn. Uonn ei denton stau in onn cun specialmein grondas tiastas. Ina tiasta da péz da 21 kilos e dapli ei denton schon ina excepziun», di il hortulan che cultivescha la horticultura en accord culla natira.
Tiasta pigl entir unviern
Il scrinari Giusep Cajacob ha detg ch’el hagi deponiu sia tiasta da péz da 21,77 kilos en clavau. «Il clavau porscha il clima ideal per la tiasta ch’jeu haiel curclau giu e prendel mintga gada mo quei che nus duvrein per cuschinar.» En clavau resti la tiasta frestga e gudibla entochen la primavera proxima. Il victur dalla occurrenza da tiastas saveva aunc buca sch’el separticipeschi era l’auter onn dall’occurrenza. «Quei decidel jeu lu cura ch’igl ei aschi lunsch.»
29 participontas e participonts
Tenor la gliesta da rangaziun han 29 persunas dalla Surselva priu part dall’occurrenza da tiastas da péz. Ils victurs: 1. Giusep Cajacob (21,77 kg), 2. Livio Caduff, (15,53 kg), 3. Gieri Orlik (13,37 kg), 4. Rino Caduff (12,69 kg), 5. Raffael Berni (12,00 kg).
In bauguos attractiv
Tenor la revista «Mein Garten Ratgeber» ei la tiasta da péz in legum ch’ei parentaus cul baguos alv. La tiasta da péz s’auda tier la famiglia dallas tiastas ed ha la fuorma d’in heighel. La tiasta da péz san ins tut tenor nua ch’ins habitescha raccoltar naven dalla stad, scriva la revista «Mein Garten Ratgeber». Il gust dalla tiasta da péz seigi buc aschi intensivs sco quel dil baguos alv. Perquei vegni la feglia dalla tiasta da péz che cuntegni specialmein biaras vitaminas era duvrada per far salata. Apropos recepts da tiasta da péz. Ei dat nundumbreivels. Mo in fetg in sempel ei bien haiel jeu cattau sin la pagina www.einfachkochen.ch. Per preparar la salata da tiasta e meila cun sosa da caschiel blau drov’ins el maximum 25 minutas. Las ingredienzas sper la tiasta da péz ed il meil ein: suc da zitrona, tschagugliuns, gromma miez grassa, peiver, caschiel cun barba blaua ed ieli da fluras sulegl. (fmr/mg)
Gust da leger dapli?