GEA > NA – u plitost NA > GEA?

L’onn passà sun jau propi stada negligenta cun ir a votar. Qua na datti naginas stgisas, jau hai simplamain manchentà tut las votaziuns. Vargugna bain! Pertge avain nus il dretg da vuschar, sche nus na faschain betg diever da quel?

Pelvaira, jau pudess star patgific senza medias da massa, senza savair tge che gira ora en il mund, senza m’occupar da la politica mundiala, federala, chantunala – e gnanc a las radunanzas communalas na sun jau preschenta. Simplamain laschar far tut a tschels e tschellas e m’empatgar da nagut. Basta ch’i giaja bain cun mai.

Na, uschè egoista ed ignoranta na poss jau betg esser. Finalmain viv jau en ina democrazia e stoss bain era surpigliar in pau responsabladad. Almain esser in pau al current da quai che passa ed avair in’opiniun.

Qua vegn gist dretg il proxim material da votar cun la posta. Questa giada vi jau far mes duair. Projects da votar sin tut ils plauns politics. Puh, qua datti insatge da leger!

Missiva per la votaziun communala: diesch paginas davart revisiun da la planisaziun locala. In tema permanent. Jau conced che jau na ves betg tras dal tut. Insumma …

Project chantunal: L’iniziativa che vul stritgar a las regentas ed als regents grischuns la pensiun per vita duranta e la cuntraproposta dal Cussegl grond: GEA > NA? U forsa NA > GEA? U forsa perfin NA > NA?

Cun nossas regentas e noss regents vai finanzialmain segir bain avunda era senza pensiun per vita duranta. Da reveder questa lescha davart ils salaris fa basegn. Ma stritgar lur renta dad in mument a l’auter, quai ma para er in pau sco als dar in pe en il tgil. Forsa era guardar ina giada tge engaschi ch’ellas ed els han. Jau na crai betg che nossa regenza fetschia sia lavur en emprima lingia per ils raps.

Insumma, adina argumentar cun raps. Adina crair che tschels hajan memia bler e memia bel! Igl è grev avunda da chattar glieud capabla che sa metta a disposiziun per ils uffizis. Plitost mussar in pau renconuschientscha envers las persunas ch’ins ha elegì. Lur missiun n’è betg simpla e la responsabladad ina detga chargia.

A reguard responsabladad: Ussa fissan nus tar in dals projects federals: l’iniziativa «Per ina Svizra che s’engascha» (Iniziativa da «service citoyen»).

Qua na chapesch jau betg il Cussegl federal ed il parlament che argumenteschan cunter l’iniziativa, che economicamain na saja betg raschunaivel d’engaschar tantas forzas da lavur per incumbensas che na correspundian betg a lur abilitads professiunalas …

A mai pari necessari che mintgina e mintgin haja la chaschun da vegnir confruntà era cun autras situaziuns en la vita che quai ch’ella u el è disà en la professiun. Per bleras/blers vuless quai dir da star si da la sutga, da far in pèr pass e da guardar enturn. A mai paressi era cler che quest servetsch vegniss fatg per ina paja minimala. Per blers fiss era quai in’autra experientscha.

U tge dis ti?

Aita Dermont-Stupan tira la renta e fa tge ch’i para e plascha. Ed ella va a vuschar!