Purschida romontscha cun plivalur

Il Check-in rumantsch dalla Lia Rumantscha intermediescha enconuschientschas da basa davart il lungatg e la cultura romontscha. Ina plattafuorma online ed in fegl sgulont sco emprem contact dattan ina survesta dallas purschidas da cussegliaziun, cuors e contacts sco era dallas colligiaziuns, offertas e materialias ch’ins drova per s’occupar dil romontsch.

En collaboraziun cun la squadra dallas regiuns dalla Lia Rumantscha ha Erica Cavegn-Pfister ch’ei  promotura regiunala dalla Lia Rumantscha en Surselva concepiu la nova purschida Check-in rumantsch. Ella di che la Lia Rumantscha seigi fetg satisfatga che tuttas 15 vischnauncas sursilvanas seigien stadas promtas senza discussiun da sustener la nova purschida. Las vischnauncas san metter il link dil check-in sin lur paginas d’internet. Cun far attent alla purschida sustegnan las vischnauncas l’integraziun linguistica da persunas che vegnan da niev a habitar en Surselva ni era ellas autras regiuns dil Grischun.

L’idea da basa ei buca nova

L’idea per scaffir ina plattafuorma digitala per las vischnauncas seigi naschida avon entgins onns tier la Lia Rumantscha, di Erica Cavegn-Pfister: «Jeu haiel survegniu l’incumbensa da concretisar l’idea e far in project ordlunder.» All’entschatta seigi ei stau da far biara lavur da sclariment. La Lia Rumantscha hagi sclariu igl interess en il cantun e seigi lu semessa vid la lavur da concepir la plattafuorma. «Nus havein luvrau culla finamira da crear in pachet finiu che dat aschi pauca lavur sco pusseivel allas vischnauncas», di la promotura dalla Lia Rumantscha en Surselva. In pachet cumpact augmenti era las schanzas ch’ina plattafuorma sco il Check-in rumantsch vegni purtada da tuttas vischnauncas, di la promotura.

Ina plivalur

Numerusas vischnauncas sursilvanas rendevan gia pli baul attents las persunas che vegnevan neutier a habitar allas pusseivladads d’emprender romontsch. La promotura regiunala Erica Cavegn-Pfister di ch’entginas vischnauncas fagevien quei a moda exemplarica. Autras fagevien empau ed zacontas fagevien nuot. «Cun il Check-in rumantsch han tuttas vischnauncas in sistem unificau. Las persunas nievdomiciliadas ston buc ir pli cheu e leu a rimnar las informaziuns. Cun il Check-in ei tut en in liug. Quei ei ina clara plivalur», di la promotura regiunala. Ei seigi da grond avantatg che tuttas vischnauncas hagien ussa il medem sistem d’informar ils nievdomicilai.

Sensibilisar

Igl emprem contact cun in niev ambient seigi decisivs, scriva la Lia Rumantscha ella communicaziun da medias davart il Check-in rumantsch. Quella plattafuorma procuri che lungatg e cultura dettien en egl immediatamein a quellas e quels che prendien domicil en ina vischnaunca. Aschia daventi l’integraziun pli sempla, di era la menadra dil project Erica Cavegn-Pfister sin damonda dalla FMR. «Ina integraziun da bial’entschatta sveglia era pli spert l’orientaziun per nies lungatg e per nossa cultura.»  

Ei dat aunc auters acturs

Erica Cavegn-Pfister di ch’ei detti sper las vischnauncas aunc auters acturs ch’ins vegli contactar pertuccont il Check-in rumantsch. Il concept da quei pachet cuntegni era la pusseivladad d’entrar en contact cun gruppaziuns da persunas privatas che habiteschien da niev ni parzialmein en nos vitgs. «Ina gruppa en mira impurtonta ein ils possessurs da secundas habitaziuns. Nus dalla Lia Rumantscha vulessan entrar en contact sco proxim culs proprietaris da secundas habitaziuns per animar quels da prender part da nossas purschidas sco per exempel nos Cafés rumantschs.»

Iniziativa beneventada

La vischnaunca da Trin renda attent alla plattafuorma cura ch’in nievdomiciliai s’annunzia al spurtegl dalla canzlia. A Glion di il canzlist communal Michael Spescha ch’els vegnien ad integrar il link dil Check-in rumantsch cun in code QR en in carnet ch’els dettien a mintga nova habitonta ni niev habitont che s’annunzi tier la vischnaunca. Era la vischnaunca da Sumvitg ha plazzau silla pagina d’internet dalla vischnaunca il Check-in rumantsch cun tuttas informaziuns neccessarias.