Portas aviartas per sensibilisar

Avon 60 onns ha giu liug a Glion ina gronda fiasta pil giubileum da 1200 onns dapi il Testament da Tello. Alla manifestaziun cul grond til festiv dils 12 da settember 1965 ein pliras mellis persunas dalla regiun separticipadas. Igl Archiv cultural Foppa (ACF) ha rimnau documents da quei eventiment. Cun ina pintga exposiziun ha igl archiv presentau ils objects rimnai. Quels exponats han era interessau ina gronda part dallas participontas e dils participonts al di dallas portas aviartas. «Nus havevan quintau cun denter 40 e 60 persunas. Cun 50 essan nus fetg satisfatgs», di il president Jan-Andrea Bernhard.

Priu part dil di dallas portas aviartas hagien interessai dalla historia culturala, denton era dunnas ed umens che derivien insumma buca dil gener historic-cultural, declara Jan-Andrea Bernhard sin damonda dalla FMR. «Nus havein schizun giu persunas che han purtau a nus la davosa sonda materialias dalla Foppa giubilonta sco per exempel maletgs dil fotograf da lezzas uras, Rostetter da Glion.»

Finamira ei da sensibilisar

In archiv seigi buc in museum, mobein plitost in arcun da scazis, di Jan-Andrea Bernhard. Ed el aschunta ch’ei seigi mintgaton indispensabel da mussar allas vischinas e vischins ils scazis. Mintgaton fetschi ins quei en connex cun ina tematica speciala e tscheu e leu en connex cun caussas actualas che seigien era impurtontas per la populaziun. Il scopo principal seigi denton quel da sensibilisar la publicitad per la lavur digl ACF e da declarar igl intent da quella instituziun. «Igl ei da grond’impurtonza che la glieud ei cunscienta ch’ins sa surdar ils scazis agl archiv cultural enstagl da dismetter ni vender quels. Jeu sperel ch’il di dalla portas aviartas hagi gidau da sensibilisar per quei intent», manegia il president digl archiv.

Damondas cumprovan igl interess

Igl interess da quellas e quels che seigien stai seigi staus gronds, declara Jan-Andrea Bernhard. A caschun dil di dallas portas aviartas seigi vegniu fatg biaras damondas. Las persunas che hagien visetau igl ACF hagien vuliu saver quei e tschei en connex culla lavur d’archivar ni era tgei che vegni insumma archivau e tgei differenza ch’ei seigi denter in archiv communal ed in archiv da cultura. Plinavon seigi era vegniu dumandau, sch’ils relaschs dils singuls vitgs restien ensemen e tgei preziusadads ch’ins catti denter quels relaschs.

Ina damonda che vegni adina seigi co igl ACF vegni finanziaus. Jan-Andrea Bernhard che presidiescha dapi la fundaziun igl onn 2016 igl ACF di ch’il sustegn pigl archiv cultural seigi fetg differents. Mo oravontut las vischnauncas sco purtadras digl ACF porschien denton in grond sustegn finanzial ed emoziunal. Per quei agid dallas vischnauncas seigi la suprastonza digl ACF fetg engrazieivla. Era quei engraziament vegli el exprimer en connex cul di dallas portas aviartas, di il president.