Il nouv portal medieval da Steinsberg
Il portal da fier battü a l’entrada dal mot da la ruina Steinsberg sur Ardez es gnü installà quist utuon. Quel fa part d’ün nouv concept per amegldrar il cumportamaint da las visitaduras e dals visitadurs da la müraglia istorica. Davart da quel concept vaiva la famiglia possessura da la ruina Steinsberg fingià infuormà ingon da prümavaira.
Eir scha la ruina Steinsberg e la ruina da la chapella San Luzi sun i’l possess da la famiglia von Planta, es tuot il mot daspö il 1861 accessibel publicamaing. Per cha quai possa eir in avegnir restar uschea e per pudair mantgnair las restanzas da quist implant medieval per las prosmas generaziuns, voul la famiglia possessura sensibilisar e render attent als visitadurs e visitaduras a nouvas reglas da cumportamaint. In quist connex ha ella eir organisà quista prümavaira üna sairada d’infuormaziun e da discussiun per promouver il dialog insembel cun la populaziun d’Ardez.
Müraglia in bun stadi
Sco cha’l rapreschantant da la famiglia possessura, Jon Andrea von Planta, vaiva infuormà dürant quella sairada dürant quist mai, es la müraglia da Steinsberg e da la chapella San Luzi in ün bun stadi per l’età da passa 1000 ons. Ma causa cha’l mot da ruina es dürant ils ultims ons gnü frequentà adüna plü suvent da visitadurs, haja per part però dat dons vi da la müraglia. Quai impustüt causa cha glieud es rampchada intuorn süllas ruinas, ma eir causa cha chavras d’eiran a pascular sül mot da Steinsberg.
Implü daja sün quist mot sur Ardez eir üna natüra intacta ed unica cun per exaimpel plantas chi sun be da chattar là u i’l chantun Vallais, uschigliö ninglur in Svizra. E la tuor da Steinsberg spordscha ün allogi eir ad utschels mez mürs. Tuot quai voul la famiglia von Planta conservar e proteger amo meglder in avegnir.
Reglas da cumportamaint
Perquai es gnü elavurà ün concept cun reglas da cumportamaint per tuot la glieud chi visita il mot da Steinsberg. Uschea esa uossa scumandà da chaminar intuorn süls mürs da las ruinas, i regna ün scumond da laschar svolar dronas ed ün scumond da laschar inavo immundizchas. Implü esa previs d’ingaschar a partir da l’on chi vain ün ranger chi controlla dürant ils dis cun grondas frequenzas quista reglas e prouva eir a sensibilisar per quellas.
Per pudair marcar il lö, a partir dal qual chi valan quistas reglas da cumportamaint, ha la famiglia von Planta laschà installar quist utuon ün portal da fier battü il stil medieval. Quel para sco sch’el as rechattess insembel cun l’implant da Steinsberg daspö passa 1000 ons sül mot e s’integrescha bain i’l contuorns. Il portal as lascha drivir a man e nu vain mai serrà culla clav. Uschea cha tuot las visitaduras e visitadurs, chi vegnan amo rendüts attents sün üna tabla a las nouvas reglas da cumportamaint, as sun consciaints da quellas cun passar quist portal.
Gust da leger dapli?