Seglias â finalmeing la sia patinera artifiziala

Avànt 21 ons e vagnida fundada l’Uniùn glatsch Viamala. Ella veva da beal’antscheata la fegnamira da realisar egna patinera artifiziala a Seglias, cumbagn c’igl vagneva fatg glatsch natiral digls 1961 annà. Seglias purscheva atgnameing cundiziùns idealas par glatsch natiral, siànd ca la part davains digl vitg e an l’umbrivgia par dus mains davent da miez november. «Mo cugl tains ân ign vieu, ca quegl nava betg ple sainza glatsch artifizial», â getg igl parsura da l’Uniùn glatsch Viamala, Stefan Collet. Igls davos ons segi sto adegna ple difizil d’anzuma ànc far glatsch. «Igl e vagnieu aschi tgòld, c’igl glatsch taneva gnànc ple dus eandas.» Igl unviern 2022/23 e quegl sto glatsch natiral durànt diesch gis, igl unviern 2023/24 par dudesch gis. Egn gi da favugn fageva ampaglia la lavur da tres, quater eandas. «Ossa pon ign ir cun schlifers digl november antocen igl mars, e sch’igl favugn vess da luantar igl glatsch, cuz’igl en de c’el e puspe fatg.» Suainter la stagiùn d’unviern vignan igls uders da sfardar puspe dustos a la plaza searva danovameing sco plaza da burape.

Egn lùng anim a bleara parschuasiùn

L’amprema amprova da l’uniùn da meter a strada egna patinera artifiziala e vagnida rafiersa da la populaziùn da Seglias igls 2005. Igl suveran tameva ca quegl segi egna greavezia mengia grànda pigl vaschinadi. Mo l’uniùn â mantanieu la sia fegnamira durànt tut quels ons. Avànt biabagn tres ons e ella puspe davantada activa sut igl presidi da Stefan Collet ad egna suprastànza nova. Cun grànd ried â l’uniùn safatg a la planisaziùn ad a la tscheartga da daners par lur project d’egn miliùn. Egn grànd diember da sponsurs, parsùnas privatas a dudesch vaschinadis – nov da la Tumleastga a tres da Schons – ân sustanieu igl project, trànter quels ear igls 120 cumembers da l’Uniùn glatsch Viamala. «Quegl e sto dus ons dirs da rabagliear anzemen quel miliùn», â getg Stefan Collet.

Promova la cuminànza

Agl curs da questa stad e’gl dantànt sto aschei’anavànt. Igls 13 d’avust â l’uniùn alura antschiet cun la realisaziùn da sieus siemi. Egna grànda part digls cumembers â prasto lavur cumegna cun montar la tecnica, las bandas, las tigetas da schurmetg a blear oter. «Igl para prest betg real», â cunzidieu Stefan Collet agls sieus pled d’avertura, cur ca la mata Flurina, igl parsura da Seglias, Martin Lippuner, ad el sez ân taglieu igl pindel cotschen par schar antrar la bargeada d’unfànts a d’inaugurar la patinera. Stefan Collet, tut igls var 100 sponsurs preschaints ad egn grànd pievel da feasta en stos tut ord cadagna an que mumaint, givlànd, cantànd a clamànd da la legreia. Igls strapazs da las eandas passadas en stos amblidos. A Martin Lippuner, c’â samusso zund impressiuno da la prestaziùn voluntaria da tutas varts, â ludo davaglia igl indrez sco liac da santupada par la glieud da vitgs a vischnàncas. Lur patinera promovi la cuminànza a las activitads sportivas, surtut quella digls giuvenils a gidi a stgivir igls taintamaints moderns. La patinera segi ear egna plevalur turistica par la regiùn agl ur digl turissem d’unviern.

Dantànt e la patinera vagnida inaugurada da l’amprema squadra digl EHC Seglias cun egn gioi d’anteriurs giujeaders a prominents a par fitar cun egna sfaranada disco sen glatsch.