Adolf Haeberli es mort cun 91 ans

L’eivna passeda ho Adolf Haeberli auncha pudieu festager sieu 91evel anniversari cun üna pitschna festina i’l ravuogl d’amias e d’amihs, chi’d ho gieu lö in l’Hotel Reine Victoria a San Murezzan. In sanda bunura passeda es el però alura mort in sieu chesa i’l minz da San Murezzan, l’uschè numneda «Villa heb di fescht». Que ho la Posta Ladina rendieu public in ün artichel online.

Ün originel da cumün

Adolf Haeberli d’eira cuntschaint scu ün dals ultims originels da cumün da San Murezzan e traunter oter per sias dispüttas e l’ingaschamaint cunter la vschinauncha da San Murezzan. Il motiv d’eira nempe cha sieu chesa immez la vschinauncha ho survgnieu divers dans i’ls ans 1980, causa cha güsta suotvart es gnida fabricheda la chesa da parker Quadrellas. Perque vaiva eir la statica dal stabilimaint patieu magari e quella ho stuvieu gnir stabiliseda cun divers indrizs da metal a l’exteriur. Perque es la chesa dad Adolf Haeberli eir gnida numneda «Villa heb di fescht».

Ils genituors dad Adolf Haeberli haun gieu pü bod il salon da cuafför e da bellezza il pü cuntschaint a San Murezzan. El svess ho lavuro i’ls ans pü giuvens scu bankier tar la Credit Suisse a Genevra, ma es zieva la mort da sieu bap turno in Engiadina per sustgnair a sia mamma cun la contabilited dal salon da cuafför e da bellezza. El ho in seguit alura però eir güdo a sia mamma in l’affer ed as vaiva specialiso sün pedicüra e manicüra.

Film da kino e documentaziuns

Ün’invista in quista chesa ed illa vita dad Adolf Haeberli s’ho que traunter oter survgnieu i’l film documentar «Haeberli», chi’d es gnieu l’an 2020 i’ls kinos. L’ouvra dal redschissur Moritz Müller-Preisser muossa scu cha Adolf Haeberli abitaiva scu ün messi in sia chesa, chi d’eira plain giazettas sparpagliedas sur tuot il fuonz. Scu ch’el manzuna i’l film saja el insè adüna sto üna persuna cun grand uorden, però la mort da sia mamma l’an 2006 hegia alura pissero ch’el saja dvanto adüna dapü ün messi. Eir il SRF es quist an auncha sto in visitas tar Adolf Haeberli cun l’emischiun «Reporter spezial – Donat auf Achse».

Be güsta principi november ho üna squedra da cuntschaints sgumbro la «Villa heb di fescht» per amegldrer la situaziun da viver dal hom da passa 90 ans – e’l Blick vaiva l’eivna passeda perfin auncha publicho ün artichel davart quist’acziun. Ma lönch nun ho el pudieu giodair quista nouva vita in sieu dachesa in uorden.

Spazi d’abiter per indigens illa «Villa heb di fescht»

Adolf Haeberli lascha però inavous ün grand regal a la vschinauncha da San Murezzan ed als indigens. Scu cha que es gnieu public a sieu 91evel anniversari in mardi passo, ho Adolf Haeberli quel di lascho funder la Fundaziun Haus zur Flora, la quela es gnida registreda i’l cudesch fundiari ün di aunz sia mort. Il scopo da la fundaziun es da s-chaffir spazi da viver pajabel per indigens in sia chesa. Scha que capita in l’edifizi existent u cun ün nouv fabricat, nun es auncha cuntschaint.