Gina Berther ei la pli ferma
Gina Berther ha gudignau la concurrenza da powerlifting ella categoria da peisa tochen 80 kg al campiunadi mundial a Paris. Mo buca mo quei: Negin’autra dunna ha alzau peisas aschi grevas sco ella al campiunadi, era buca quellas en categorias da peisa pli aultas.
La fin dall’jamna vargada han ils campiunadis da powerlifting giu liug a Paris. Per Gina Berther (31), oriunda da Rueras, eis ei stau la tiarza participaziun a campiunadis mundials. Per l’emprema ga eis ella denton sedecidida da concurrenzar pil classament total dallas treis disciplinas ella categoria tochen 80 kg: Alzar ord la schanuglia, alzar la peisa giu dil baun ed alzar sur la crusch. Als campiunadis mundials valan las treis disciplinas sco disciplinas singulas. Lu vegnan ellas absolvidas sur treis dis. Ella categoria dil classament total dallas treis disciplinas sco Gina Berther ha absolviu, vegnan quellas absolvidas en in sulet di. La fin finala vegnan las peisas quintadas ensemen.
Success cumplein
Gina Berther ha alzau 155 kg ord la schanuglia, 100 kg giu dil baun e 212,5 kg sur la crusch. En tuttas treis disciplinas eis ella stada la megliera dalla categoria da peisa tochen 80 kg. Il total da 467,5 kg ei buca mo staus il meglier da sia categoria, mobein da tuttas 32 dunnas ch’ein separticipadas ad ina categoria ni l’autra tochen 110 kg. Ella disciplina alzar sur la crusch ha ella contonschiu ina peisa da 212,5 km. Quei ei in niev record mundial. Entochen oz ha negin’autra dunna alzau ina peisa aschi greva. Quei record ha ella migliurau per tschun kilos. Buca da surstar che Gina Berther ei fetg cuntenta cun quellas prestaziuns: «Igl ei stau l’emprema ga ch’jeu sun separticipada alla categoria tochen 80 kg. Fetg cuntenta sun jeu surtut cullas emprovas ch’jeu hai giu. Tuttas totalmein nov emprovas (mintgamai treis per disciplina) ein stadas valeivlas.»
Buca stau optimal
Ch’il campiunadi mundial a Paris ei reussius aschi bein ha schizun fatg surstar Gina Berther sezza: «Las preparativas ein buca stadas bunas. Entochen in’jamna avon ils campiunadis hai jeu giu difficultads culla musculatura dils caluns. Leutier ei vegniu fetg bia lavur duront l’jamna ora, per part tochen ditg viaden ella sera.» Dapi in onn e miez lavura Gina Berther sco cussegliadra d’immobiglias: «Jeu lavurel sur sesezza e per quei motiv ei la lavur da prender cu ella vegn.» En vesta al campiunadi mundial seigi ella denton sefidada da sesezza e da siu trenader, quei che seigi la fin finala stau in bien recept. Quellas preparativas plitost suboptimalas hagien apparentamein giu in effect positiv. «Damai che buca tut ei stau optimal, sun jeu era buca stada gnervusa.» Gina Berther che habitescha a Brig trenescha denter otg e diesch uras per jamna e quei sper in pensum da lavur cumplein. Sco Gina Berther ha detg sin damonda, ei era Savio Giossi, medemamein da Tujetsch, separticipaus als campiunadis mundials. El seigi denton staus il sulet ella categoria dils juniors.
Senza drogas
Ils campiunadis mundials a Paris ein stai quels dall’Associaziun internaziunala da powerlifting senza drogas (International Drug-Free Powerlifting Association). Sco ins sa leger silla homepage dall’associaziun promova ella in sport fair e d’integritad dil powerlifting. Entras las controllas e sancziuns sigl entir mund garantescha ella in sport schuber e l’egualitad dallas schlatteinas.
Gust da leger dapli?