Ateliers aviarts el casti da Löwenberg
Sonda, ils 22 da november 2025, arvan las artistas ed ils artists dil casti da Schluein Löwenberg lur ateliers. Denter las 14.00 e las 02.00 envidan las commembras ed ils commembers da Löwenberg Art ad in program fetg variont.
Per la tschunavla gada arvan las artistas ed ils artists dil casti da Löwenberg a Schluein lur portas sonda, ils 22 da november 2025. Quei che ha entschiet igl onn 2021 sco ina pintga occurrenza per mussar lur process creativs, ei daventau en cuort temps in liug d’inscunter per art, grafica, fotografia, scienzia, ballet, architectura, manufactura, grafica, cheramica, clowneria, design da mobigliar, accumpignament da tristezia, film, management da cultura, cussegliaziun da colurs e stil bia auter.
In di plein inscunters
Il casti da Löwenberg ei dapi plirs onns in liug ella periferia nua che art e cultura vegn fatga visibla, tgirada e sviluppada. Ils ateliers aviarts dattan ina ga ad onn la pusseivladad d’experimentar quella diversitad creativa. Las visitadras ed ils visitaders san spassegiar individualmein atras ils locals ed ils ateliers, discuorer cun artistas ed artists, far ina guida historica, tedlar referats, empruar ora novas tecnicas ni semplamein guder l’atmosfera speciala dil baghetg. El center stattan buc las ovras finidas, mobein surtut il sguard sil process. (cdm/fmr)
Tier il casti dat ei negina pusseivladad da parcar. L’entrada als Open Ateliers duront il di ei gratuita. Entrada tier il concert da Ladunna 20 francs, per giuvenils entochen 20 onns 10 francs. Ils bigliets ein da retrer alla cassa dalla sera. Negina prevendita, il diember da plazs ei limitaus. Ulteriuras informaziuns ed urari detagliau sut: https://www.loewenberg.art.
Gust da leger dapli?