Lag Salischinas cun novs investurs

Il december 2024 ei il TCS Svizra seretratgs sco investur dil project dil Lag Salischinas denter Rabius e Surrein. La vischnaunca da Sumvitg sco purtadra dil project cun ina vasta purschida pil temps liber e turissem ei allura semessa cun success alla tscherca d’in niev investur. Quel ei promts d’investir en ina part dil project.

30 casas el stil da tiny houses

Ils investurs ein la Stimbag SA e la JPAG Immobilien SA da Jona. Ellas ein promtas da baghegiar las casas entuorn il lag da Salischinas. Quellas vegnan silsuenter vendidas dalla Stadler Immobilien SA, medemamein da Jona. Sco Hans-Peter Péclard dalla JPAG Immobilien SA ha detg sin damonda dalla FMR, setracta ei da 30 casas. Da quellas vegnan 17 baghegiadas directamein spel lag, 13 en ina zona cun plontas. «Igl ei casas pintgas el stil da tiny houses cun mintgamai duas alzadas», di Hans-Peter Péclard. Las treis interpresas han gia realisau plirs projects en Surselva, surtut a Laax. «Ina da nossas cundiziuns per las casas a Salischinas ei stau da saver realisar ellas culla Tarcisi Maissen SA da Trun. Ella ei in bien e fidau partenari», puntuescha Hans-Peter Péclard. Davart ils cuosts dallas casas ha el saviu far neginas indicaziuns. Las casas han il status da habitaziuns secundaras administradas. Ils cumpraders che fuorman allura ina societad da condomini han l’obligaziun da schar affittar las casas per vacanzas duront in temps fixau. Ils investurs realiseschan quellas en dretg da baghegiar.

Rinforzar il turissem

Il project da Salischinas cumpeglia infrastructura pil temps liber, da campar e dormitori. Cun excepziun dallas casas entuorn il lag segna la vischnaunca da Sumvitg responsabla per tutt’ulteriura infrastructura. «Quei ei il lag sco tal, il campadi culs baghetgs necessaris sco tualettas, il baghetg principal per recepziun, administraziun ed ustria sco era in magasin», di il president communal da Sumvitg, Patrick Schaniel. Aunc buca definiu eis ei tgi che meina lu il menaschi. In’evaluaziun en quella direcziun succeda medemamein el rom dalla fasa da projectaziun. La finamira dil project ei d’offerir ina purschida differenziada e conforma alla fiera per aschia rinforzar il turissem da stad, porscher plazzas da lavur e la fin finala ina plivalur alla regiun.

Rodund 30 milliuns francs

Igl entir project dil Lag Salischinas ei calculaus cun cuosts da 30 milliuns francs. Pertuccont la finanziaziun dil project ha la vischnaunca gia giu contact cul Cantun ed il Program San Gottardo. Tenor Patrick Schaniel ein ils signals da survegnir in sustegn finanzial fetg empermettents. La finamira dalla vischnaunca ch’ei purtadra dil project ei da saver lantschar las lavurs da baghegiar il mars 2029. «Igl entir project sto vegnir realisaus il medem mument, damai che l’infrastructura penda en quei senn ina vid l’autra, per exempel pertuccont la recepziun ed administraziun. Per che las casas sappien vegnir baghegiadas sto il lag esser realisaus», puntuescha Patrick Schaniel.

Procedura politica

Avon che las maschinas da baghegiar sappien serender sigl areal a Salischinas, sto il project denton aunc passar las tortas politicas. «Nus havein iniziau la revisiun dil plan directiv da turissem dalla regiun. Quei mument che quel ei adattaus suonda la revisiun dalla planisaziun locala», di Patrick Schaniel. En rodund in onn duei vegnir instradau ina procedura da cooperaziun publica. Entochen miez digl onn 2028 duessen las lubientschas esser avon maun. Sco Patrick Schaniel di, ei il rapport da preexaminaziun vegnius inoltraus al Cantun. Igl Uffeci pil svilup dil territori hagi confirmau l’impurtonza dil project pil svilup dalla regiun. Il medem mument hagi quel denton era puntuau las pretensiuns ord vesta dalla planisaziun dil spazi. «Il project total ei lu vegnius surluvraus. Differentas variantas ein vegnidas evaluadas. La varianta ch’ei ussa avon maun perschuada pertuccont la qualitad dalla cuntrada e las pretensiuns dalla fiera sco era la realisabladad», scriva la vischnaunca en ina communicaziun als mieds da massa.