Reparter la lavur sin dapli schuialas

Dapi igl onn 2018 consista la suprastonza communala da Medel da treis commembers. Avon era ei tschun ed igl avegnir duei ei puspei esser tschun. Davart quella midada el rom d’ina revisiun parziala dalla constituziun communala decida il suveran dumengia, ils 30 da november 2025 all’urna. Il medem di han las Medelinas ed ils Medelins era d’eleger in niev commember per la suprastonza communala. Sco successur da Werner Venzin che seretila per la fin digl onn stat Lucas Venzin a disposiziun. Il mument eis el suppleant dalla suprastonza communala ed en quei senn buc in noviz dil tut.

Da treis sin tschun

«La structura cun treis commembers ed in suppleant dalla suprastonza communala ei funcziunala. La communicaziun ei sperta, las decisiuns vegnan pridas efficientamein e la collaboraziun enteifer la suprastonza ei nuncumplicada», scriva la suprastonza communala el messadi per mauns dalla votaziun dil pievel. Il medem mument constatescha ella denton era: «Tuttina ha il temps mussau ch’il pensum per treis persunas ei gronds.» Ensemen culla cumissiun «Suprastonza 2027+» ei la suprastonza communala sefaschentada dil futur dall’executiva. Ensemen ein ellas vegnidas alla conclusiun ch’ina repartiziun dalla lavur sin tschun persunas ei indicada. En tschun seigi la lavur dil mintgadi pli moderata ed era pli surveseivla.

Bia lavur e termins

La fin d’october ei quei model vegnius presentaus allas vischinas ed als vischins. «Cun pressapauc 30 presentas e presents ei l’orientaziun stada frequentada fetg bein, surtut era da bia giuventetgna. Insumma ein giuvnas e giuvens stai stediamein allas radunonzas dalla vischnaunca ils davos onns», di il president communal Claudio Simonet. Il retuorn da treis sin tschun commembras e commembers dalla suprastonza communala seigi vegnius beneventaus. «La glieud vesa ch’ei va en treis mo perquei che tuts ein pensiunai. Sper ina professiun ei in tal uffeci cun bia lavur e termins strusch da dumignar», constatescha Claudio Simonet. La votaziun davart la lescha da votaziun ch’ei medemamein necessaria en quei connex, ei previda ils 18 da december 2025 alla radunonza communala. Silsuenter duei il model niev ir en vigur l’entschatta 2026.

Dus novs igl onn vegnent

Aschilunsch ch’il suveran accepta la revisiun dalla constituziun communala e cun quella igl augment da treis sin tschun commembras e commembers dalla suprastonza communala, vegnan duas ni dus novs eligi primavera proxima ella suprastonza. La primavera 2027 ein las elecziuns ordinarias previdas e lu vegnessan tuts – pia era quels che vegnan tscharni igl onn vegnent – en elecziun. Sco quei che Claudio Simonet di, vegnan el ed il gerau Corsin Flepp buc a star a disposiziun igl onn 2027 per in’ulteriura perioda d’uffeci. Cun auters plaids: Cull’elecziun da Lucas Venzin la fin da quest meins vegn tschentau ils binaris per ina resch nova suprastonza communala da Medel.

Forzas giuvnas

«Nus essan da buna fei ch’ei reusseschi d’anflar candidatas e candidats. Entginas persunas han gia signalisau igl interess per surprender in uffeci ni l’auter», di Claudio Simonet. Igl avegnir dat ei negin suppleant dalla suprastonza communala. «Entochen tier las elecziuns da duas persunas supplementaras en suprastonza primavera proxima ston tuts treis esser presents per che nus sappien decider», constatescha Claudio Simonet e puntuescha: «Il model niev cun tschun commembras ni commembers da suprastonza ei ina schanza unica ed il medem mument eis ei uras da schar luvrar forzas pli giuvnas.»