Asterix ed Obelix van sin la «Davos»

Pli baud eri cler: Ils raps da satg stuevan crair vidlonder per cumprar il pli nov comic dad Asterix u Lucky Luke. Ed oz? Silmain tar ils Asterixs vala quai anc adina.

Avant in mais è cumparida la pli nova ediziun dal comic da cult, la 41avla istorgia dals Galliers (u fissi da scriver Gals, tenor ils dicziunaris rumantschs?). Il titel tudestg dal nov tom è «Asterix in Lusitanien», l’original franzos sa numna «Astérix en Lusitanie». Il titel tradescha gia, nua che Asterix e ses ami Obelix passentan lur nov’aventura – en Portugal, ch’era avant var 2000 onns la colonia romana «Lusitania».

Questa giada restan ils auturs-successurs dals legendars Albert Uderzo e René ­Goscinny – Didier Conrad e Fabcaro – propi fidaivels a las ingredienzas principalas d’in Asterix. I na dat naginas firlefanzas. Ils dus cumpogns gals han da salvar in ami or d’ina praschun a Lissabon (Olisipo). Els al salvan la finala dals liuns grazia a lur astuzia, a lur amis ed a la bavronda magica. Sa chapescha scuntran els durant lur aventuras da tuttas sorts spezialitads e particularitads portugaisas: il bacalhau, il vinho verde, las chanzuns da fado e la famusa malanconia, la saudade. I dat baruffas cun legiunaris, bellischems gieus da pleds e bleras allusiuns al gir dal mund – perfin cun connexs grischuns! Il prefect corrupt da Lissabon envida a tut ils ritguns dal mund ad in’orgia sin sia bartga. La bartga ha num «Davos»! 

Damai, als amis ed a las amias dad in classic comic dad Asterix saja recumandà da cumprar (cun ils raps da satg) il nov tom. Perfin ils pirats ston puspè crair vidlonder!