«Las finanzas han piars gl’equiliber»

«Las finanzas fan gronds quitaus ed han occupau fetg nus il davos temps», ha Hansueli Baier, il president dil cussegl d’administraziun dallas pendicularas da Breil concediu duront ch’el ha presentau venderdis sera a Breil la bilanza da sia interpresa. Las finanzas hagien buca pudiu tener petg, culs plaids da Hansueli Baier: «Ellas han buca pudiu far frunt al squetsch dalla vegliadetgna dils indrezs da transport. Las finanzas han era buca pudiu resister alla pressiun dalla midada dil clima ed al squetsch dalla clientella che giavischa dapli comfort.» Quei vul dir concret ch’ils pli vegls indrezs hagien varga 50 onns e stoppien vegnir remplazzai. La midada dil clima porti era negina neiv ella part giudem dil territori da skis e pretendi novas infrastructuras per transportar siado ella neiv la glieud. Tenor Hansueli Baier seigien las pendicularas da Breil era per quels motivs buca pli cumpetitivas. «Pervia da tut quels facturs han nossas finanzas piars igl equiliber.»

Investurs generus

Alla radunonza generala ha la FMR intervegniu ch’igl acziunariat havevi oriundamein mess sco finamira che las pendicularas dueigien finanziar sesezzas. Quei seigi denton dapi silmeins 15 onns in’illusiun, ha il president dil cussegl d’administraziun detg: «Biaras e biars acziunaris seregorden che nus havein stuiu sanar gia avon diesch onns nossa bilanza cun ina reducziun dil capital. Da lezzas uras havein nus era stuiu procurar per daners frestgs d’ina valeta da treis milliuns francs.» Quei seigi per cletg reussiu grazia a 12 novs investurs che seigien seuni en ina nova societad afiliada cun num «Anavon». Quella ei stada denter auter inizianta dil Pradas Ressort e consista d’acziunarias ed acziunaris dallas pendicularas, ha Hansueli Baier detg. Pervia dil Ressort Pradas ei la gruppa d’investurs «Anavon» era interessada vid in bien menaschi dallas pendicularas. Oz dumbri ella 22 investurs che hagien en tut ils onns ch’ei detti «Anavon» pagau siat milliuns francs. Ina gronda part da quels daners hagien las pendicularas duvrau per cuvierer deficits structurals enstagl da saver investir ils raps en nova infrastructura.

Alp Dado ha dau la boga

La davosa investiziun che las pendicularas da Breil han fatg ei stau la sanaziun dall’ustria Alp Dado sur Vuorz avon dus onns. Tenor il rapport dil president hagi quella sanaziun da tschun milliuns francs dau la boga allas finanzas e duvrau il rest dil capital dalla societad Anavon. Era la vischnaunca da Breil ha pagau in milliun francs per la sanaziun dall’ustria da muntogna Alp Dado.

Proximas investiziuns

Alla radunonza d’acziunarias ed acziunarias han ins udiu ch’ei detti proximas investiziuns che fussien da far en novs indrezs da transport. Cun prioritad stuessien ins remplazzar la sutgera da Breil siado el territori da skis. Il motiv principal ei che la sutgera ei buc il mied da transport adattau per in territori cun munconza da neiv. Las pretensiuns per ina pendiculara che porta ils skiunzs tochen siado el territori cun neiv avunda seigien fetg grondas, ha il president dil cussegl d’administraziun Hansueli Baier declarau. El ha denton buca presentau plans concrets co ins savessi construir ina nova pendiculara da Breil viers l’Alp Dado.

Ei drova la vischnaunca

Davart dil cussegl administrativ ei vegniu accentuau alla radunonza generala en casa da scola a Breil ch’ins seigi sedumandaus savens ils davos meins co exister vinavon senza daners. Hansueli Baier: «Igl ei stau clar per nus il davos temps che mo la vischnaunca da Breil sa gidar ord la situaziun desperada. Nus essan era sedocumentai cul model dalla cumpra dalla Arena Alva entras las vischnauncas. Quei model da proprietad ch’ei vegnius acceptaus dalla maioritad da quellas vischnauncas.» Il cussegl d’administraziun ei sinquei s’entupaus culla suprastonza communala da Breil e pli tard era culs novs suprastonts, il president communal designau Roman Flepp e gerau Adrian Bergamin, per discutar la participaziun futura dalla vischnaunca. Il cussegl d’administraziun dallas pendicularas hagi en scadin cass sentiu la promtezia e l’empatia, ei vegniu detg alla radunonza.

Cundiziuns han mess en rocla

Roman Flepp ha detg venderdis sera alla radunonza generala ch’igl engaschi futur dalla vischnaunca tier las pendicularas seigi ina realitad probabla. All’entschatta dallas discussiuns denter pendicularas e vischnaunca havevan ils novs gerai colligiau gl’engaschi dalla vischnaunca cun cundiziuns, sco per exempel che la vischnaunca delegheschi duas persunas el cussegl d’administraziun, ch’ella sappi surprender la maioritad dallas aczias e ch’ella surprendi la controlla dalla societad Breil Ressort SA. Quellas pretensiuns han clamau sillas barricadas ils acziunaris dalla societad «Anavon». Sut l’egida digl econom indigen Marcel Friberg ha «Anavon» mess a disposiziun ussa in ulteriur pac da denter in e dus milliuns francs per segirar l’entschatta dalla stagiun d’unviern 2025/2026.

Quater novizs

Il diember da commembers dil cussegl d’administraziun ei vegnius augmentaus ussa da tschun sin siat persunas. Sco novizs ha la radunonza elegiu ils dus representants dalla vischnaunca da Breil, Roman Flepp ed Adrian Bergamin. Ultra da quei ein Otmar Seiler ed il secundindigen Adrian Oehler vegni elegi. Demissiunau han Richard Caduff e Roman Cathomas. Els ein vegni undrai per lur lavur da biars onns per las pendicularas da Breil.

Aunc negin CEO

Il CEO dalla pendicularas, Ivo Maissen, vegn a bandunar siu post la fin da schaner 2026 suenter ch’el ei staus mo biebein in onn en uffeci. Aunc dat ei negina successura ni successur per el. Alla radunonza generala ei vegniu communicau ch’ins vegni a cuntinuar cun ina sligiaziun intermediara. Sandra Brügger, la menadra dils survetschs centrals dall’interpresa, vegn a suprender il post da CEO ad interim. Ella vegn sustenida cun plaid e cussegl digl anteriur menader Ivo Maissen.