La casa ei beinpleina

«Nossa casa ei beinpleina», ha Claudia Bischofberger confirmau. Ella fa part dalla suprastonza da Löwenberg ART. L’uniun includa tuttas artistas ed artists che lavuran en lur ateliers el casti da Schluein. Quellas e quels han organisau sonda vargada in gi dallas portas aviartas. Avon tschun onns ei la casa s’aviarta per tuttas specias digl art, da cultura, lavur e mistregn. Ina part dalla casa ei reservada per l’organisaziun Surselva Impact Lab. Quella promova il svilup d’interprendiders giuvens. Ina part essenziala dalla casa ein ils ateliers d’artistas e d’artists. Actualmein ein quels da nov dunnas ed in um uni sut il medem tetg. Ell’atgna stanza san els sededicar a lur sparta digl art figurativ ni expressiv.

Schi biars visitaders sco aunc mai

Sonda ein quels ateliers stai aviarts. Buca mo quels, era aunc 13 auters locals, biros da fatschentas ed interprendiders pigns. Glieud che ha visitau l’emprema gada gl’anteriur casti da Schluein ei stada surstada  dalla varietad en casa. En ina stanza lavura ina grafichera, ella vischinonta in specialist che taglia films, en ina tiarza ha ina fotografa endrizzau siu studio. «Nus essan ina biala cuminonza che secumplettescha in l’auter», ha Claudia Bischofberger getg alla FMR. Ina gada ad onn organisescha ella, ensemen culla suprastonza dall’uniun, il gi da visetas. Schi biara glieud sco quella gada hagi denton aunc mai visitau lur casa, ha la managera da cultura manegiau. 

Sillas quater alzadas dalla casa serepartan localitads da tuttas grondezias. «Ils davos quater onns ei il Löwenberg sesviluppaus ad in center inspiront cun ina cuminonza vitala plein ideas», aschia Claudia Bischofberger. Al gi da viseta ein biars – era glieud dil vitg da Schluein – daventai cunscients dalla midada ch’ei ha dau el casti. La cuminonza dil Löwenberg includa ton il biro digl investur sco era pratica d’accumpignament en cass da malencunrada. Il  luvratori da ceramica, la sala da clowneria ed il biro da design da mobiglias han medemamein aviert e schau entrar ils hosps. Lur domicil el Löwenberg han plinavon specialistas e specialists da scenografia, architectura, scola da lungatg, cussegliaziun da stil, art per affons sco era la scola da ballet.