Lectura rumantscha

Ils ultims pleds rumantschs?

Sche ti vas en libraria, lura datti curunas plain crimis: Henning Mankell, Donna Leon, Agatha Christie, Andrea Camilleri ed anc blers auters. E crimis rumantschs? – I na dat betg uschè blers. Però i dat era victimas ch’han ditg lur davos pleds en net e stget rumantsch! L’autura putera Gianna Duschletta ha ussa scrit in crimi che porta il titel «Affers da famiglia». Sco ch’ella tradescha en l’intervista, ha ella propi sviluppà il plot «en famille», vul dir vi da la maisa cun l’atgna famiglia. Lain sperar che quellas discussiuns na sajan betg idas a finir mal …

Breil è en la sumbriva

«Segir betg!» – pensas ti ussa. Il vitg da Breil n’è segir betg en la sumbriva, mabain sin spunda sulegliva! Ma exact quai è forsa era in problem dal territori da skis da Breil. Quel ha mintgatant, pervi da si’exposiziun sulegliva, in pau difficultads cun la naiv. I duvrass investiziuns per exempel en in nov access si da la val. Ma danunder prender ils daners? Las pendicularas èn plitost en la «sumbriva finanziala». Venderdi èn vegnidas discutadas schliaziuns.

Il chaun procura per ruaus!

Sche ti legias questa frasa, lura has ti probabel in cler maletg en testa: «Il chaun procura per ruaus!» – Probabel vesas ti in chaun da polizia che fa urden cun ils laders. U che ti vesas in chaun pastur che fa urden cun nursas e lufs. Però adatg, tes maletgs t’engianan. I va numnadamain per Gia, il nov «chaun da scola» en la secundara a Vaz. Gia procura apunta per calma e ruaus en stanza da scola.

Dal rest, in pitschen mument da ruaus e da pasch ha era chattà il columnist Rafael Müller, dentant betg en scola, mabain tar il sontg Antoni da Padua. Buna lectura!