Vernissascha dil cudisch da canzuns per affons Camillo

Suenter rodund in onn da lavur intensiva ei il cudisch Camillo, il cameleon el mund magic dallas canzuns da Riccarda Camenisch, promts per la vernissascha. Quella ha liug venderdis, ils 12 da december 2025 allas 18.00 ell’aula dalla casa da scola a Laax. Las 14 canzuns ein colligiadas tras la historia dil cameleon Camillo ch’enquera si’atgna melodia e che conta sin siu viadi ensemen cullas pli differentas figuras: Dalla miur Mics sur pirats e drags tochen las strias dil cuolm blau. Cun occasiun dalla vernissascha prelegia l’autura, cumpositura ed illustratura dil cudisch Riccarda Camenisch. Ensemen cun scolaras e scolars dalla scola Laax conta ella canzuns ord sia nov’ovra.

Canzuns per tedlar e cantar

Sco la Surselva Romontscha scriva en ina communicaziun als mieds da massa ei Camillo dapli ch’in cudisch. El cuntegn numnadamein ton las notas dallas singulas canzuns sco era codes da QR che renvian direct als audios ch’ins sa cargar giu gratuitamein. Camillo ei pia concepius aschia ch’ins sa era duvrar el en scola, sco Riccarda Camenisch fa sezza dapi onns cun sias canzuns ella scola a Laax. Ils audios dallas singulas canzuns ha Manfred Zazzi (Aquarium Studios GmbH) produciu cun cantaduras e cantadurs romontschs. Chiara Jacomet, Riccarda Camenisch, Dario Hess e Gino Carigiet han dau lur vuschs allas differentas figuras che contan en Camillo.