Viver e surviver

Avrir la spina e simplamain baiver aua. Ir a cumprar en stizun da tuttas sorts victualias ch’ins dovra u ch’ins na dovra insumma betg. U prender ina tabletta encunter il mal. – Tut quai sa chapescha da sasez per ils blers da nus.

En il mintgadi faschain nus paucs patratgs davart il co e cum ch’ins vegn tar insatge da mangiar u da baiver. Nus vivin en la cucagna. Ma tge capita, sche quai n’è betg pli il cas? Sche las stizuns fissan serradas? Sch’i na vegniss nagin’aua netta or da la spina? Tge avess jau alura da far per avair sin maisa mes gentar e mia tschaina?

Jau fiss spert a mes cunfins da mia savida e da mias abilitads, sche jau avess da surviver ora en la natira selvadia. – Ir a chatscha u ir a la tschertga da nutriment. Bajegiar in suttetg segir … – Jau na survivess betg ditg!

Exact cun da quellas dumondas è dentant sa fatschentada la redactura Nina Defuns en ses film dad RTR «(Sur)viver en la natira – ina sfida per l’uman modern?». Ella ha fatg in test da quatter dis. En ina gruppa han els fatg l’experiment d’empruvar da surviver en la natira – equipads propi mo cun il pli essenzial. Igl è in experiment interessant che dat era da patratgar. Da vesair è il film en la seria «Clic» sin il player dad RTR.