Spusalezi e lu nozzas

«El decuors da quei davos onn d’emprova cun cantar da cuminonza ein ils dus chors baselgia s’avischinai»,di Rita Gfeller-Vincenz, la presidenta dil chor baselgia fusiunau dapi strusch quater jamnas. «Nus havein sentiu ch’ei funcziunescha bein da vart catolica e da vart reformada. Ussa essan nus 32 commembras e commembers enstagl dalla mesadad en mintga chor.»

Il chor baselgia reformau sco era il chor baselgia catolic da Sagogn han tschercau il contact in cun l’auter gia la primavera 2023. «Il di da suppa ecumen cantavan nus schon dapi plirs onns ensemen», raquenta Rita Gfeller-Vincenz. Anno 2024 hagi ins fatg in ulteriur pass communabel cun cantar sco chors reuni a caschun dalla fiasta da cant districtuala a Trun e da Nadal 2024 sco chor baselgia en omisduas baselgias da Sagogn.

Salvar in chor sco finamira

Rita Gfeller-Vincenz ch’ei carschida si a Sagogn e ch’era avon la fusiun presidenta dil chor baselgia catolic ha detg ch’ei fussi strusch stau pusseivel da cantar aunc ditg vinvavon sco chor baselgia catolic cun mo circa 16 cantaduras e cantadurs. «Nus havevan era buca dirigenta ni dirigent.» Ed era il chor reformau sesanflavi en ina situaziun semeglionta culla munconza da cantaduras e cantadurs. «Pia havein nus fatg ord il basegns ina vertid cun mussar che nus da Sagogn vulein viver l’ecumena ella part musicala dallas pleivs.»

In pass gagliard e historic

Il chor baselgia catolic da Sagogn ei seformaus gl’onn 1976 cugl intent da cantar per la messa nuviala da sur Alfred Cavelti il matg 1977. Il chor baselgia reformau ei vegnius reactivaus anno 1991 suenter plirs onns pausa. «Tenor mei eis ei buca stau in grond pass ussa per nus da s’avischinar», di la presidenta dil chor baselgia fusiunau. «Mo igl ei per omisdus chors in pass gagliard e surtut historic che fuss buca staus pusseivels avon 20 onns a Sagogn perquei ch’il chor baselgia catolic haveva da quei temps aunc biaras presentaziuns en baselgia duront igl onn ecclesiastic. Oz ei era quei semidau. Nus catolics cantein buca tontas gadas pli en baselgia», di Rita Gfeller-Vincenz.

Litteratura per omisduas baselgias

El niev chor baselgia ecumen da Sagogn ein ins pertscharts ch’ei drova ina tenuta toleranta e cooperativa enviers la differenta litteratura da cant dils catolics e dils reformai. La presidenta dil chor fusiunau declara: «Il chor baselgia catolic ha adina era cantau messas en baselgia. Cun quella tradiziun vulessan nus cuntinuar silmeins dallas fiastas grondas dalla pleiv catolica.» Ed era la pleiv reformada hagi sias atgnas fiastas, sco per exempel la confirmaziun ni era il firau da Venderdis sogn. «Uonn da Pastgas havein nus per l’emprema gada ell’historia ecclesiastica da Sagogn cantau ina messa en baselgia reformada. E nus havein giu fetg buns resuns», di Rita Gfeller-Vincenz.

Georg Candrian, il dirigent dil chor baselgia da Sagogn seigi aviarts per la musica d’omisduas confessiuns, di la presidenta: «Il dirigent e nus cantaduras e cantadurs vulein cun la fusiun da nos dus chors era purtar la tradiziun musicala d’omisduas confessiuns en omisduas baselgias da Sagogn.»

Maridaglia cun contract

Ils dus chors baselgia da Sagogn han stuiu prender ina decisiun dapersei ed approbar sco emprem il contract da fusiun. Suenter che omisdus chors han detg gie a quei contract, han ins la medema sera dils 28 d’october 2025 salvau l’emprema radunonza generala communabla cun eleger las funcziunarias ed ils funcziunaris, cun approbar ils statuts e fixar il program da lavur. Rita Gfeller-Vincenz: «Nus essan fetg ventireivels ch’il commembradi ha detg gie unanimamein alla via communabla. Negin ha detg na e negin ha calau da cantar pervia dalla fusiun.» Il program d’exercezis cun il dirigent Georg Candrian ha ussa entschiet ed il chor vegn a cantar uonn da Nadal en omisduas baselgias e lu a cuntinuar cun ver sis presentaziuns en las duas baselgias entochen a nossa perdanonza digl october 2026.