Cawetta futur – egna nova pista da trenamaint
Aintadem la Val Avras e’gl vagnieu iniziieu questa stagiùn igl project «Cawetta futur». Egna pista da trenamaint e vagnida preparada cun nev artifiziala spezialmeing par clubs da skis d’unfànts a da juniors. La dumonda par egna tala pista da trenamaint e stada grànda ad ascheia ear’ella bagnprest ocupada antocen igl dezember. Ear da la partida e sto igl Club da skis Tumpriv da la Val Schons.
«L’ideia digl project ‹Cawetta futur› e da porscher egna pussevladad da trenamaint a clubs da skis an la vaschinànza a da spargnear ascheia vieadis ple lùngs», raquenta igl Beni Michael – iniziànt da que project. La pista vean messa a quent par 150 fràncs par duas uras. Quegl e par blears clubs egn’alternativa atractiva a trenamaints sen sglatschers. Schabagn ca l’oferta vean purschida per davent da quest atun, en las pistas schon reservadas tocen igl dezember.
Trenamaint efiziaint
La realisaziùn tecnica sa basa sen egn indrez dad anavar ca la Avers Skibetriebe SA a mess a disposiziùn. Quegl e 3,6 hectaras taratsch anavos da dus canùns da nev a propeler a zirca 7000 meters cubics consum d’aua par stagiùn. Quegl e dantànt betga bùnmartgieu. «Igl antier project vegi custo daple ca 750 000 fràncs. Cun antradas anualas da 325 000 fràncs fussi que project betga sto pussevel da realisar sainza donaziùns finanzialas», raquenta Beni Michael.
Davent digls 1. da november 2025 antocen curt avànt Nadal ad eventualmeing la parmavera statan las pistas exclusivameing a disposiziùn a clubs da skis. La Livia Michael, skiùnza da l’US Tumpriv raquenta: «Que project e fetg practic. La Val d’Avras e fetg manevla, a cunquegl ca la pista e curta, e igl trenamaint fetg efiziaint.»
Impuls economics
Clubs digl Grischùn, da la Svizra Orientala, digl Tessin a da la Germania digl Sid profiteschan schon ussa da la purschida, a par la regiùn porta la frequenza turistica augmantada avànt la stagiùn prinzipala ear impuls economics. Tanor igl Beni Michael, segi igl project egn grànd suczess ca vigni siir ear mano anavànt agl futur.
Gust da leger dapli?