Reelecziun onorevla digl president
Marc Casparin resta pigls proxims dus onns parsoura dalla Secziun Piz Platta digl Club Alpin Svizzer. Da nov an suprastanza è neida eligeida Martina Ardüser. La secziun ò aint igl frataimp 1030 commembers e commembras.
La Secziun Piz Platta è egna dallas 110 secziuns tgi appartignan agl Club Alpin Svizzer. An Svizra è chegl egn digls gronds clubs da sport cun radond 180 000 commembers e commembras. Aint igl Grischun dattigl nov secziuns cun 13 900 commembers e commembras.
La 105avla radunanza generala dalla Secziun Piz Platta è stada venderde passo a Summaprada. Dalla parteida èn stadas passa 80 persungas e chegl digl antier Grischun Central.
An sies rapport annual ò igl parsoura dalla secziun, Marc Casparin, menziuno cunzont igl curs da salvamaint d’anviern tg’ò gia li igl schaner 2025 a Beiva. Chel seia sto an tots gros en success ed er cun ena bunga participaziun. Igl curs da salvamaint d’anviern 2026 ò digl reminent li igls 10 da schaner a Valragn. Sto preschaint seia el, scu president dalla Secziun Piz Platta, er alla radunanza da delegos svizra ad Aarau ed er alla radunanza digls presidents dallas secziuns dalla Svizra orientala a Sargans.
109 turas cumpeglia igl program annual
A pled èn er neidas a Summaprada las treis persungas tg’èn stadas responsablas igl 2024/25 per la realisaziun dallas turas organisadas dalla Secziun Piz Platta digl Club Alpin Svizzer. Chegl èn Adriano Peterelli, igl schef da turas d’anviern, Christian Zinsli igl schef da turas da stad e Flavia Gantenbein, tgi organisescha las turas per la «JO». Igls dus manaders da turas e la manadra da turas on fatg ena bilantscha positiva digl davos onn da turas. Singulas turas èn stadas occupadas pi bagn e per otras è igl interess sto pi pitschen. La participaziun allas turas è savens er dependenta dalla previsiun dall’ora.
Bagn frequentadas èn er stadas las turas 50 + , turas pi simplas e betg schi pretensiousas. Er igl program da turas 2025/26 è fitg vast, stattan segl program igl anviern 51 turas e la stad 58 turas. La Secziun Piz Platta dispona actualmaintg da 23 manaders e manadras da turas, tgi dereivan dalla Regiun Alvra e dalla Regiun Viamala inclus la Val Schons. Nov tar chella gruppa èn nias vetiers Andri Buchli e Michael Ziefele. Marc Casparin ò menziuno tgi seia en fatg plaschevel tgi la secziun vegia igl mument en bel domber a manaders e manadras da turas, chegl tgi seia betg adegna sto igl cass. Vetiers vignan anc igls 22 manaders e las manadras da turas dalla «JO».
Cun esser malsang, igl schef dallas gruppas da salvamaint Andy Schatz, è nia renunztgia agl rapport annual dallas gruppas da salvamaint.
En gudogn da 7733 francs
Chegl tgi pertotga las finanzas ò la Secziun Piz Platta gia en bung onn da gestiun 2024/25. Igl chint annual chel sera cun en gudogn da 7733 francs. Tar las antradas è la somma dalla contribuziun annuala da commembers e commembras cun stgers 27 000 francs la pi ota cefra. Tar las sorteidas costan la sparta turas e la sparta dalla gasettigna digl club igl pi bler.
Cun grond applaus on igls preschaints reeligia Marc Casparin per dus ulteriours onns scu parsoura dalla secziun. Nia eligia era el igl 2022. Reeligia scu schef da turas da stad è nia Christian Zinsli e scu scheffa dalla «JO» è neida confirmada Flavia Gantenbein. Martina Ardüser ramplazza Maja Barrera an suprastanza. Lezza era anfignen ossa responsabla pigl uffezi ambiaint e cultura. Las otras quatter persungas tgi appartignan alla suprastanza dalla Secziun Piz Platta èn betg stadas an elecziun.
94 antradas e 42 sorteidas
Igls davos 12 meis èn 94 persungas davantadas da nov commembras dalla Secziun Piz Platta digl Club Alpin Svizzer. 42 persungas èn sorteidas, uscheia tgi da preschaint ò igl club 1030 commembers e commembras. Alla fegn dalla radunanza èn neidas undradas 33 persungas per lour commembranza dalla secziun e chegl da 25 onns anfignen 70 onns. 50 onns commember dalla Secziun Piz Platta è tranter oter er Giatgen Augustin d’Alvaschagn.
Gust da leger dapli?