Taglia sin objects: Tgei schabegia ussa?

«La caussa ei en discussiun ellas treis vischnauncas», conferma il scarvon da Flem, Martin Kuratli. En connex culla valur dall’atgna locaziun che vegn abolida ha la FMR vuliu sondar la situaziun ellas treis vischnauncas turisticas Flem, Laax e Falera. Quellas ein pertuccadas da sperditas da taglia pervia dalla votaziun dil pievel dils 28 da settember 2025. Sch’els hagien entschiet a discutar las consequenzas, ha la FMR vuliu saver. Ils treis presidents communals Christoph Schmidt a Flem, Norbert Good a Falera e Franz Gschwend a Laax ein s’uni sin ina risposta communabla, la caussa seigi en discussiun, rispundan els.

Arver la discussiun

Probablamein ei la caussa en discussiun buca mo en quellas treis vischnauncas. Nua ch’ei ha surproporziunalmein biaras habitaziuns secundaras spiardan las cassas communalas entradas da taglia. Il GIE federal all’urna per abolir la valur sill’atgna locaziun ei cumbinaus cun in «zucher»: Ils cantuns hagien la pusseivladad da cumpensar las sperditas e d’introducir ina taglia sin objects. Ed ussa, cu entscheiva la discussiun publica da quella nova taglia sin immobiglias? – «Nossas vischnauncas vegnan buc a saver selubir da desister dalla taglia sin objects», manegia Kevin Brunold, il directur da Surselva Turissem e deputau.

Cun bunamein 58 % ha il pievel svizzer approbau la pusseivladad d’imponer ina taglia sin habitaziuns secundaras – sin talas ch’ils possessurs drovan sezs. Quei sa caschunar novs conflicts cullas Cuminonzas dils proprietaris da habitaziuns secundaras. «Quella discussiun ch’ei vegn a dar, ston ins menar aviartamein. La maioritad giu la Bassa che ha vuliu abolir la valur dall’atgna locaziun ei stada pertscharta ch’ils cantuns da muntogna survegnan la pusseivladad d’introducir quella taglia sin objects.» Il deputau dalla Foppa e president dalla partida dil Center conferma che la tractanda vegn buca stuschada, mobein ch’ella ei sin meisa e che la politica grischuna prepara la discussiun publica. Tuttas instanzas politicas, il Cussegl grond e las vischnauncas vegnan a prender posiziun tier ina proposta e consultaziun d’ina revisiun dalla lescha da taglia.

La Conferenza da 45 vischnauncas

Sco el Grischun piardan era en auters, el Valleis, Tessin, Berna e Vad, oravontut las vischnauncas cun bia habitaziuns secundaras. Ellas astgan e duessan cumpensar lur sperditas, pil Grischun eis ei circa 30 milliuns francs ad onn. Quella cefra ha la Conferenza dils presidents communals da destinaziuns da vacanzas ellas muntognas eruiu. L’opziun ch’ils cantuns hagien la pusseivladad d’introducir ina taglia sin object ha influenzau ils 28 da settember il resultat dall’iniziativa naziunala. «Quella pusseivladad ston ins ussa exnum trer a néz», scriva la Conferenza. Igl ei in gremi enteifer la Gruppa svizra dils territoris da muntogna (SAB), da quel fan 45 vischnauncas part. En Surselva ein quei Flem, Laax, Breil, Mustér e Sursaissa.

Ils 30 d’october 2025 ha la Conferenza discutau in proceder communabel, ella recamonda allas Regenzas cantunalas d’includer las vischnauncas ella lavur d’elaborar la legislaziun leutier. «Ils cantuns dueigien discuorer in cun l’auter e prender en mira ina harmonisaziun dalla taglia sin objects», scriva la Conferenza dils presidents communals da destinaziuns da vacanzas ellas muntognas. «Il Cantun ha la suveranitad dallas leschas. El sa introducir la taglia sin objects sur la lescha cantunala da taglia ni era sur la lescha davart taglias da vischnauncas e da baselgia», declara il scarvon da Flem, Martin Kuratli.

Decisiuns fundamentalas il december

Kevin Brunold conferma ch’ils singuls cantuns ston vegnir activs. «Las vischnauncas ston denton esser libras da decider, sch’ellas vulan introducir la taglia sin objects ni buca», puntuescha el. E cu vegn il cantun Grischun activs en caussa, cu instradescha quel il project «taglia sin objects? – «Igl ei buca exclus che la Regenza vegn a presentar gia il meins da december diversas decisiuns fundamentalas», rispunda Toni Hess, il menader dil survetsch giuridic e substitut dil menader digl Uffeci cantunal da taglia. Il facit actual dalla «tractanda»: Ei vegn discutau davos las culissas e tut che spetga gl’emprem impuls dil Cantun.