Proxima fegn d’emda vign giuia e fatg festa

Curling è en sport tg’è fitg popular cunzont an Canada, an Scozia ed er an Scandinavia. An Svizra dattigl 163 clubs da curling cun radond 8000 commembers e commembras. Tar campiunadis mundials, tar olimpiadas e tar campiunadis europeics totgan igls Svizzers e las Svizras siva da decennis tar las pi fermas squadras, tgi gudognan er adegna medaglias. Do a curling vign er aint igl Grischun e siva da 60 onns er a Savognin.

Digls 22 clubs da curling digl Grischun dereivan gist tschintg da Surmeir. Igl pi vigl club da curling da Surmeir è igl Club da curling Lai/Valbella, tg’è nia fundo igl 1921. 44 onns pi gioven è igl Club da curling Savognin, tg’è nia fundo igl 1965. Igls oters treis clubs da curling da Surmeir èn nias fundos ensatge pi tard. Chegl èn igls Clubs da curling Barvogn, Bogn Alvagni e Filisour.

Fundo igls 13 da favrer 1965

Cun scumanzar avant passa 60 onns a Savognin igl svilup turistic è igl 1964 er nia fatg aint igl manevel dalla soptgera da Savognin a Tigignas per l’amprema geda en glatsch natural. Igl amprem turnier ò gia li aint igl meis da schaner 1965 e giuia chel on treis teams. A disposiziun stava en sulet schinumno «rink». Igl de digl turnier mussava igl termometer ena temperatura da minus 27 grads. Igl motto digl turnier è sto igl suandont: «Lebensfreude und Humor kommt auch bei den Curlern vor».

Stgers en meis siva digl turnier è nia fundo aint igl hotel Pianta a Savognin igls 13 da favrer 1965 igl Club da Curling Savognin. Igls commembers da fundaziun èn stos igls suandonts: Sepp Guetg, Uliss Peterelli, Bistiang Uffer, Georg Uffer e Not Uffer da Savognin ed igls quatter giasts Hermann Fitzau, Willi Grätzer, Karl Waldraff e Stephan Wittum.

Avant 50 onns passa 60 commembers

Igl domber da record da commembers e commembras ò igl Club da curling Savognin gia igl 1975 cun 46 commembers activs, dus juniors activs e 13 commembers passivs. Igl 1984 eran chegl 35 commembers activs, 1 junior activ e 22 commembers passivs. Aint igl onn da giubileum igl 2025 dombra igl Club da curling Savognin 35 commembers activs ed 8 commembers passivs.

Igl 2015 ò gia li en turnier da giubileum e pigl anniversari radond da 60 onns ò igl turnier da giubileum lia la proxima fegn d’emda. An sia istorgia da seis decennis ò igl Club da curling Savognin gia ples success chegl sen camp naziunal, cantunal e regiunal. Igl 1983 ò igl team digl club contanschia tigl campiunadi svizzer sot tschiel avert a Kandersteg BE, igl 8avel post. Alla squadra on appartignia da lez taimp Baltermia Peterelli scu skip, Nino Bruseghini, Pol Savoldelli e Gion-Peder Uffer, barmeir.

Manaders da gi èn stos an chels seis decennis, Willi Grätzer, Rudolf Albisetti, Gion-Peder Uffer, Hans Trenkwalder, Meltger Plaz e siva digl 2024 Romeo Giovanoli. Cassier digl club è Mauro Guetg, actuar è Florian Unterkalmsteiner e schef da material è Sven Thomann. Parsoura è siva da treis onns Damian Dosch. Igl anviern 2025/26 stattan segl program pigl Club da curling Savognin gist 12 coppas internas. Adegna la gievgia seira cun en’unica excepziun la dumengia. Agls turniers interns on er betg commembers e betg commembras digl club la pussebladad da sa participar cun paer 10.00 francs.