4,5 milliuns francs per spazi d’abitar pajabel

In occasiun d’üna radunanza cumünala in venderdi passà ha la suprastanza cumünala da Valsot preschantà ils detagls davart il proget per transfuormar l’anteriura scoula a Ramosch in üna chasa d’abitar cun set abitaziuns. Quellas abitaziuns sun previsas sco spazi d’abitar pajabel per indigens e vi da quist proget es il cumün da Valsot landervia fingià daspö il 2023. «La sairada es gnüda tutta sü in möd positiv ed id ha eir dat üna discussiun constructiva, ingio cha la populaziun ha fat sias dumondas e dat tschegns», disch Christian Poo, il manader da l’administraziun cumünala da Valsot.

Preschantà cuosts e fits

L’infuormaziun es nempe statta organisada sco orientaziun in vista a la radunanza cumünala da preventiv, chi’d ha lö als 16 da december 2025. Dürant quella dess eir gnir decis davart la realisaziun dal proget per abitaziuns. In venderdi passà sun eir gnüts preschantats ils cuosts finals pel proget da la scoula, chi sun calculats cun var 4,5 milliuns francs. «Tant ils cuosts, ma eir ils fits per las abitaziuns han dat l’andit per dumondas da la populaziun. Tschertüns han forsa cret cha’ls fits füssan plü favuraivels. Ma nus vain pudü muossar sü las radschuns pels predschs calculats», disch Christian Poo.

Illa scoula da Ramosch prevezza il proget vendschader «Caruso» – chi’d es gnü fat da l’architect Urs Padrun da Guarda – abitaziuns da 4,5 stanzas, 3,5 stanzas sco eir ün studio dad 1,5 stanzas. La suprastanza cumünala ha eir calculà e preschantà ils fits per las abitaziuns in venderdi passà. Ma quels nu sun amo definitivs, causa cha’l proget pudess eir amo gnir plü favuraivel, o chi’s pudess eir amo vender abitaziuns.

Opziun da vender abitaziuns

«Culs fits nu voul il Cumün da Valsot insomma na generar guadogn, dimpersè be cuernar ils cuosts. Implü s’orienteschan ils fits als predschs dal marchà d’immobiglias actual. Quai es stat fich important a la suprastanza, da render attent eir a quai», disch Christian Poo. El agiundscha cha las abitaziuns sajan lura però eir sül plü nouv standard e cha’ls cuosts supplementars – sco p.ex. il s-chodamaint – sajan in congual cun otras immobiglias congualablas fich bassas.

Implü ha la suprastanza cumünala eir infuormà in venderdi passà davart la pussibiltà cha’l cumün vendess duos o trais da quellas abitaziuns per finanziar üna part dal proget. Quist punct es tenor Christian Poo eir gnü discus da las preschaintas e preschaints. Tenor el d’eira la majorità davo la discussiun da l’avis, chi füss üna bun’idea da vender l’üna o tschella da las set abitaziuns progettadas. «Il böt principal da l’orientaziun, nempe d’infuormar a temp a la populaziun – sco eir da preschantar a pussibels fittadins las abitaziuns – quel vaina in mincha cas ragiunt. Uossa as po la glieud far seis impissamaints fin la mità december, cur chi vain decis definitivmaing davart quist proget», disch Christian Poo.