«Meis Segner e meis Dieu»

Meis Segner e meis Dieu

Piglia davent tuot quai da mai chi am separa da Tai

Meis Segner e meis Dieu

Dà tuot quai a mai chi am collia cun Tai

Meis Segner e meis Dieu

Am piglia davent da mai ed am dà cumplettamaing a Tai

Cun quists pleds da frar Niculaus da Flüe vuless eir eu hoz meditar ed urar.

Piglia davent tuot quai chi am separa da Tai. Tuot quai chi sta tanter mai e Tai, tanter mai e mai, tanter Tai e Tai. Impustüt mias temmas, causa las qualas eu nu poss crajer ch’eu saja bun da spostar muntognas. Ch’eu saja bun da chaminar süll’aua. Ch’eu saja bun da resüstar our da la mort in nouva vita. Piglia davent da mai quistas temmas per ch’eu possa dvantar liber. Per ch’eu possa gnir adüna plü dastrusch a Tai e plü daspera a mai.

Dà tuot quai a mai chi am collia cun Tai. Am regala Teis spiert per ch’eu fingalmaing possa incleger. Per ch’eu possa chapir cumplettamaing e cun tuot meis esser cha separaziun es adüna be ün’illusiun. Colliaziun, cumünanza es, d’eira e sarà adüna l’unica vardà. Cha in vardà nun exista ingüna separaziun. Cha tuot es per adüna collià – eu cun Tai – eu cun mai – Tü cun tuot – eu cun tuot – tuot cun tuot – ün unic grond ed etern nus.

E perquai am piglia uossa davent da mai ed am lascha tuornar a chasa pro Tai. Là dingionder ch’eu deriv. Là ingio ch’eu d’eira adüna fingià da chasa. Ingio chi nu dà plü meis pitschen eu, dimpersè be plü il grond esser. Ingio cha mia e Tia vöglia sun üna. Ingio chi nu dà plü ingün spazi ed ingün temp. Ingio cha Tü ed eu e tuots e tuot sun ün.

Meis Segner e meis Dieu

Piglia davent tuot quai da mai chi am separa da Tai

Meis Segner e meis Dieu

Dà tuot quai a mai chi am collia cun Tai

Meis Segner e meis Dieu

Am piglia davent da mai ed am dà cumplettamaing a Tai