Undrientscha per Adrian Pfiffner

Sonda vargada ein commembras e commembers dall’uniun-purtadra dall’Arena tectonica Sardona s’entupai a Sargans al «Geo-Höck». Sco quei che Harry Keel, il meinagestiun, communichescha, ha ei cun quella caschun dau alla fin in act ufficial: La «Deutsche Geologische Gesellschaft» (DGGV) ha undrau il professer emeritau da geologia Adrian Pfiffner da Domat culla medaglia «Leopold-von-Buch». Igl ei ina distincziun a persunalitads ch’ein sefatgas meriteivlas cun prestaziuns extraordinarias per la perscrutaziun geologica dallas Alps. La DDGV renconuschii Adrian Pfiffner, scriva l’Arena tectonica Sardona ella communicaziun da medias, sco in scienziau da grond renum internaziunal ella sparta dalla tectonica e dalla geologia structurala. Gronds merets hagi el che l’UNESCO hagi recepiu il 2008 la regiun Sardona ella gliesta dils patrimonis mundials dalla natira. Adrian Pfiffner seigi stau ina persuna da clav cun preparar, inoltrar e presentar la candidatura. Il scienziau che discuora sco lungatg-mumma il romontsch da Domat ei seprofilaus buca mo cun publicaziuns scientificas, mobein cun cudischs populars che avischinan in e scadin alla geologia dallas Alps. Pliras ovras da standard digl autur Adrian Pfiffner, denter auter «Geologie» der Alpen», ein schinumnai longsellers ellas librarias.