La capo vul defender l’agen sez

Quest’emna han duas partidas grischunas svelà ils nums da lur candidatas e candidats per las elecziuns da la regenza ch’è il zercladur 2026. L’entschatta da l’emna ha la Partida populara svizra (PPS) mess en vista da vulair candidar previsiblamain cun duas u cun ina da duas persunas: cun Valérie Favre Accola e Walther Grass.

Vegnì ora cun la puma: Aita Zanetti 

Mesemna è era la partida dal Center vegnida ora cun il marmugn ed ha preschentà sias candidaturas per il proxim onn. Ensemen cun ils cussegliers guvernativs en uffizi – Carmelia Maissen e Marcus Caduff – va previsiblamain Aita Zanetti en cursa per succeder a Jon Domenic Parolini che banduna il gremi causa limitaziun dal temp d’uffizi.

Aita Zanetti (55) è deputada da l’Engiadina Bassa, capo da la vischnanca da Scuol, pura, commerzianta e mamma da quatter uffants. Per la direcziun da la partida èsi stà impurtant da purtar – suenter l’Engiadinais Parolini – puspè ina candidatura or da las vals dal sid dal chantun, sco ch’il president da partida Kevin Brunold ha ditg mesemna en occasiun d’ina conferenza da medias. En l’intervista cun la FMR ha Aita Zanetti dentant laschà valair: «La candidatura è in grond pass per mai, perquai ha la decisiun duvrà temp per madirar.»

Il ticket da trais candidaturas è per il mument pir ina recumandaziun d’elecziun da la direcziun da la partida. Las duas candidatas ed il candidat dal Center ston anc vegnir confermads tras la radunanza da nominaziun da la partida. Quella è als 23 da schaner 2026. Ed era las autras partidas grischunas vegnan anc a concretisar e nominar proximamain lur candidatas e candidats per las elecziuns dal proxim onn.