Lectura rumantscha

Tgi ha inventà la scrittira rumantscha?

Che ti legias insumma quest text ussa en lingua rumantscha, quai è tranter auter la «culpa» dad in politicher da Zuoz! L’onn 1527, pia avant bainprest 500 onns aveva Gian Travers scrit ina «chanzun» per sa defender politicamain. Per che sia glieud al chapeschia, ha el scrit quai per rumantsch. Bain logic! En vista al giubileum da 500 onns da quella defaisa politica rumantscha, datti puspè festivitads a Zuoz. I paress che quella vischnanca daventia ussa il «place to be» per festas rumantschas, sco quella dal 2019 en connex cun 100 onns Lia Rumantscha. In dals capo-organisaturs tradescha pertge che Zuoz è in lieu ideal per talas festas.

Quant custa la tgira da mes uffant?

Il Grischun ha lantschà ils davos mais in program per sustegnair famiglias che dattan en tgira externa lur uffants (p.ex. en canorta). Il Chantun paja prest 6 milliuns francs dapli per sustegns en quel connex. Ma il nov sistem va anc bravamain a pe zop. I dat vuschs criticas or da canortas e famiglias. Ma tge è atgnamain il problem?

Discurra cun la FMR – e ti fas carriera!

Forsa avevas ti legì en ina gasetta rumantscha da l’onn 2021 la gronda intervista da dunnas. En connex cun 50 ons dretg da vuschar da las dunnas aveva la FMR numnadamain fatg in tavulin cun ina gruppa da quatter dunnas fitg engaschadas: Giuanna Beeli, Corina Casanova, Viola Cadruvi, Carmelia Maissen ed Aita Zanetti. Da quel temp na seseva gnanc ina dunna en la regenza grischuna. Pauc suenter quell’intervista è Carmelia Maissen vegnida elegida en la Regenza. Ed ussa candidescha er Aita Zanetti per quel gremi. Ti vesas pia, intervistas cun la FMR èn ina sort catapult per carrieras politicas!