L’Ovomaltina e la reclama saimpla

Chi chi sa rumantsch, sa daplü. Cha quai es mia frasa prediletta, nu stöglia manzunar specialmaing. Quai san tuottas e tuots chi legian mias columnas. Quista maxima am plascha uschè bain, perquai ch’ella es a 100 % vardaivla. Cun quista frasa vain nempe fat reclama pel rumantsch, e quai però in üna moda e maniera chi disch propi la vardà. Quai nun es lönch na adüna il cas.

Reclama es suvent sco ün bikini – ella fa quaida, ma nu muossa tuot. Reclama po però eir esser plufra, dafatta fich plufra, e metter in dumonda a sai svess – sco quella per l’Ovomaltina e la squadra da skis svizra. Chi chi baiva Ovomaltina – ans voul dir quista reclama – nu sa far meglder alch, mobain plü lönch. Quai vala forsa per ir in muntogna, per restar sdasdà, per ir cun auto in vacanzas o chosas simlas – ma sgür brich per guadagnar üna cuorsa da skis. Scha la curridura o il curridur douvra plü lönch, eir sch’ella o el savess far meglder, lura es la cuorsa persa. Uschè simpel es quai.

In quist connex am dumonda propi, scha’ls respunsabels per la squadra da skis svizra nun han badà, quant cuntradictoria e ridicula, per nu dir plufra, cha la reclama es in vista a quai cha quellas persunas praticheschan e chi fan reclama per quist prodot. Perche as dan quels nan per far üna reclama talmaing stüpida? Sco chi para hana però svess badà quai, perche cha l’Ovomaltina nun es plü sponsura dad Odermatt, Gut e consortas. E guarda qua: i san far lur roba meglder co’ls oters – e douvran tuot in üna vouta dafatta damain temp co la concurrenza.

Reclama d’üna medemma qualità – voul dir plufra – fa eir la marca Audi. Sch’eu tilla guard illa televisiun, lura am vain propi il scuffel. I’s vezza ün Audi Quattro a passar d’inviern sur ün pass. Ed il messagi es quel: Cun ün Audi cun tracziun a quatter roudas nun hast ingüns problems, la stagiun nu giova ingüna rolla, tuottafat tenor il slogan da la marca: «Avantag, grazcha a la tecnica». Be: Il filmin muossa bain ün Audi Quattro chi traversa üna cuntrada da naiv da bellezza. Fin qua es tuot in uorden. Ma lura vegna tut plainamaing pel chül. La via dal pass chi vain muossada es – bella quista – da catram e naira nairischma, sainza il minim floc da naiv. Per ir sur quel pass bastess eir meis vegl «käfer» o dafatta ün «döschwo» – tuots duos cun üna tecnica a moda veglia e na uschè müravgliusa sco quella d’ün Audi Quattro.

Ma chi guarda fingià uschè precis, sch’ün Audi traversa üna cuntrada cuernada da naiv o brich?

Peider Andri Parli da Cuira è stà translatur e redactur ed è anc adina grond amatur da maluns, fatgs cun truffels da la sort «Parli».