Rir durant che Goldbridge patescha

Il temp dad aur dal club da ballape Manchester United è gia daditg passà e tuttina è il club da ballape englais in dals clubs cun ils pli blers fans sin il mund. In da quels fans è Mark Goldbridge. Il YouTuber englais e creader dal chanal da YouTube «The United Stand» è sa sviluppà ils ultims onns ad ina figura da cult tar ils fans da Manchester United, ma era tranter ils fans dal ballape en general. Cun gronda savida analisescha el gieus live, senza script, ed exact quai fa daventar ses stil uschè unic.

Mark Goldbridge na reagescha betg simplamain sin quai che capita sin plazza, el viva quai. Sch’ils defensurs fan sbagls, vegn inventà spontanamain in affrunt plain fantasia sco per exempel: «Our defence is moving like a fridge on roller skates!» Talas improvisaziuns èn gia daditg daventadas sia spezialitad. Or da frust nascha divertiment ed or da sbagls da ses club preferì naschan sgnoccas sco: «Might as well have a garden gnome playing in the midfield.»

Sper «The United Stand» maina Goldbridge era il chanal «That’s Football», sin il qual el accumpogna gieus da ballape da l’entir mund. Là vai main per Manchester United, persuenter per il «drama» da la Premier League, ils turniers internaziunals e sias reacziuns legendaras che van savens viral.

Tuttina, sche victoria, terrada u caos total, a Mark Goldbridge reussescha da colliar ballape cun umor, emoziuns ed enconuschientschas dal fatg. Tgi che guarda ina giada ses chanals sin YouTube chapescha spert pertge che millis persunas al guardan live, perfin durant dis, nua che la balla fiss pli gugent restada a chasa.