Ils miedis d’affons da Glion sedostan

Per els sco miedis d’affons seigi ei stau ina surpresa, cura ch’els hagien intervegniu alla radunonza da delegadas e da delegai dalla SanaSurselva dils 11 da november 2025 ils motivs dalla mesira da spargn da serrar la partiziun da naschientschas el spital da Glion. Oravontut che quella mesira hagi da far cul pensiunament proxim da Benedikt Malin, il miedi d’affons e miedi directiv dalla pediatria dil spital da Glion. El e sia collega, la miedia directiva Nathalie Casutt han perquei decidiu da scriver ina rectificaziun cun pliras damondas.

Ils dus pediaters che han ina pratica el marcau vegl da Glion e che lavuran omisdus era el Spital regiunal Surselva accentueschan sco emprem punct ch’ei detti dus miedis d’affons el spital da Glion. Cura che in miedi seigi igl onn 2026 en pensiun, resti aunc adina ina pediatra el spital. Il secund punct: Ei seigi cert che Nathalie Casutt resti era suenter il pensiunament da Benedikt Malin e ch’ella vegli cuntinuar culla lavur era el Spital regiunal Surselva. Ed il tierz punct ella brev: La miedia Nathalie Casutt seigi engaschada actualmein culla lavur per ina sligiaziun co ei mondi vinavon suenter il pensiunament da siu collega Benedikt Malin. Quei seigi era vegniu communicau alla SanaSurselva en in discuors persunal.

Ei drova dus

La FMR ha dumandau René Epp, il president dalla SanaSurselva, sche la suprastonza dalla SanaSurselva hagi survesiu ch’ei detti actualmein dus e buca mo in miedi d’affons el Spital regiunal Surselva. Ina miedia vegni pia a restar. Na, di ­René Epp, mo alla fin finala seigi la suprastonza dalla SanaSurselva partida dil fatg ch’ei drovi era suenter la pensiun dil schefmiedi dad oz dus pediaters e buca mo in per segirar il survetsch da pediatria commensuradamein. «Il problem ei da saver garantir siat dis ad jamna duront 24 uras il survetsch d’urgenza.» Quei survetsch stoppi esser garantius era egl avegnir. «Cun ina solia persuna dalla medischina vegn ins buca da garantir quella segirtad per las pazientas.»

Tenor la suprastonza dalla SanaSurselva drovi pia ina secunda miedia ni miedi che garanteschi la cuntinuitad dil survetsch d’urgenza ella partiziun da naschientschas. «Igl ei grev da mantener quella partiziun surtut era pervia dil diember da naschientschas. Mo il punct impurtont ei d’haver il persunal qualificau per la partiziun da naschientschas e per la pediatria.»

Glion ha reagau

En lur brev che la FMR ha survegniu la mesjamna vargada giavischan ils miedis d’affons da Glion ina discussiun che s’orienteschi als fatgs. Mo aschia seigi ei pusseivel da prender ina decisiun a liunga vesta pertuccont igl avegnir dalla partiziun da naschientschas el spital da Glion. Pliras damondas stoppien vegnir discussiunadas. Per exempel quella dils viadis naven da sisum la Surselva a Cuera en in cass d’urgenza. In auter punct seigi quel dil diember da cass per onn. E sco tierz punct seigi da sedumandar con gronds ch’il respargn annual fuss en cass che la partiziun da naschientschas da Glion vegness serrada.

In’intervenziun dalla delegada dalla vischnaunca Ilanz/Glion ch’ei vegnida acceptada dalla radunonza da delegadas e delegai dalla SanaSurselva dils 11 da november 2025 procura per ina prolungaziun dil temps da decisiun davart la partiziun da naschientschas. Quella proposta meins restrictiva che la proposta el messadi dat ussa treis meins dapli temps per anflar ina sligiaziun per in niev caumiedi dalla pediatria.

Communicaziun ei buna

Il president dalla SanaSurselva ei dalla idea che las vischnauncas, ils responsabels dil spital regiunal ed ils miedis d’affons hagien la medema finamira, numnadamein da vegnir tier in resultat pertuccont igl avegnir dalla partiziun da naschientschas. «Nus havein negin problem da communicaziun e fagein tut nies pusseivel. La SanaSurselva ei dependenta dalla collaboraziun dils miedis d’affons actuals en Surselva. E nus essan perschuadi che la miedia Nathalie Casutt seigi la persuna culla cumpetenza neccessaria per elaborar in avegnir stabil dalla pediatria el Spital regiunal Surselva.»

La SanaSurselva hagi la responsablad era per las situaziuns d’urgenza. Decider decidien alla fin finala las delegadas ed ils delegai dallas vischnauncas, di René Epp ch’ei dapi 2025 president dalla Sana­Surselva.

La brev ei arrivada

La brev cun las resalvas e precisiuns dils pediaters Benedikt Malin e Nathalie Casutt ei arrivada tier il president dalla SanaSurselva. «Per nus ei quei in resun ch’ei giustificaus e che nus prendin serius.» Ils miedis d’affons hagien apparentamein vuliu rinforzar lur posiziun. Benedikt Malin e Nathalie Casutt spetgan rispostas dalla suprastonza dalla SanaSurselva. Sco els concluden en lur brev ein quellas rispostas egl interess dalla famiglias, dalla regiun e d’in ferm spital regiunal Surselva.