Lectura rumantscha

Il «Spick» engiadinais

Forsa avevas era ti abunà durant tes temp da scola il «Spick». U che tes uffants l’han abunà oz? – L’Engiadina enconuscha gia dapi passa 100 onns ina revista cun istorgias, stincals ed engiavineras per uffants: l’Aviöl. Jau en mintga cas aveva adina in milli gust durant mes temp da scola da questa revista – e sa chapescha surtut da la rubrica dals «Stincals». Ussa hai dà ina midada en la redacziun da quella pitschna revista. Ma ils «Stincals», quels restan, per fortuna.

Co garantir il servetsch tar naschientschas?

Tar blers spitals che han ina crisa finanziala, vai a la fin dals quints era per ina dumonda spinusa: Mantegnair u stritgar la partiziun da naschientschas? Quella discussiun hai dà a Tusaun ed uss er a Glion. Per in ospital e per in’entira regiun èsi sa chapescha ina gronda perdita da dar si gist quella «partiziun da l’avegnir». A Glion vai ussa tranter auter per la dumonda co e cun quants medis ch’ins po insumma garantir quel servetsch tar naschientschas ed accumpagnament pediatric.

Tgi cumpra ina claustra?

Cumprassas ti ina claustra? – Bain cler, subito! – Bler spazi d’abitar, locals multifuncziunals, infrastructura en in bun stadi. Uschia che la claustra dominicana da Glion chatta segir svelt in cumprader, damai ch’ella ha decis ultimamain dad ir en vendita cun ses stabiliment. Però adatg, tenor in interprendider da la Svizra Centrala ch’ha gia cumprà duas claustras, è ina tala cumpra plitost ina «Spinnerei».

Dal rest, il mais da november va vers la fin – pia èsi in bun mument per laschar repassar anc ina giada ils schabetgs cun il «Mais da pais».