La nouva halla da glatsch po gnir fabricheda

Votantas e votants da San Murezzan haun appruvo il credit ­generel da 114 milliuns francs pel proget «Islas». Que haun els decis cun ün cler resultat da 1048 vuschs SCHI cunter 462 vuschs NA. Il proget cumpiglia traunter oter üna nouva halla da glatsch, ma eir ün parkegi sutterraun ed ün nouv center da reciclagi. Aunz cha las lavuors paun cumanzer, stu però eir auncha gnir saneda üna veglia deponia suot il plazzel da fabrica.

In vista a quist grand proget da generaziun po la vschinauncha dimena cuntinuer eir cul plan cumplessiv «Islas Ludains» sper il Lej da San Murezzan, inua cha la veglia arena da glatsch as rechatta. Quella gnaro sbudeda.

Il plazzel da fabrica dal proget «Islas» da la vschinauncha da San Murezzan as rechatta dadour la vschinauncha da Champfèr. Scha tuot vo tenor plan, cumanzaro la fabrica l’an 2027. La ­halla da glatsch vess dad ir in funcziun la fin da l’an 2030.