Grazia a Galaxus – il «Teebeutelproblem» è schlià

Galaxus è en emprima lingia in shop online. Ses sortiment cumpiglia rauba da tuttas sorts per mintgin e mintgina. Sco ch’jau hai scuvert dacurt è Galaxus dentant dapli che be la pli gronda stizun online da la Svizra.

Galaxus publitgescha numnadamain er ina revista digitala ch’i vala la paina da perscrutar – il Galaxus Magazin. Tar ils artitgels vai sa chapescha il pli per products ch’ins po cumprar en il shop. Ma savens èn ils texts er infurmativs u scrits cun in tun umoristic, sco per exempel l’artitgel «Ein reflektiertes Völkchen: Das sollten wir uns von Finnland abschauen».

Grazia a quest text vegnan lecturas e lecturs a savair ch’i fa part da la cultura finlandaisa da purtar reflecturs da segirezza e ch’il pur finlandais Arvi Lehti ha inventà l’emprim reflectur per peduns la fin dals onns 1950. E sche tals cuntegns n’interessan tuttina betg, pon ins plinavant era simplamain sa legrar dals titels captivants ch’ins chatta en il Galaxus Magazin: «Walze oder Rolle – was wischt den Boden besser?» u «Planung statt Panik: Wie gut hilft dieser Ratgeber im Küchenalltag?» legian ins tranter auter.

Il punct culminant è dentant ch’il Galaxus Magazin porscha per part era schliaziuns per problems dal mintgadi, sco per exempel tge far cul satget da té, cura che la bavronda è pronta. En quest connex tradescha l’artitgel «Ein neuer Teebecher löst das Beutelproblem» ch’i dat da nov cuppins cun in caum integrà per depositar il satget.

Malgrà che l’uschenumnà «Teebeutelproblem» m’era fin ussa nunenconuschent, poss jau tuttina ma legrar che quel è finalmain schlià – grazia a Galaxus.

Di per di dat ina redactura u in redactur da la FMR in tip a lecturas e lecturs – in cussegl u ina recumandaziun, senza impegn e senza garanzia che quel «tip» plaschia alura a tuttas e tuts.