Critica invers il «Rapport Weidmann»

La società da promoziun Pro Crusch da viafier alpina Terra Raetica critichescha fermamaing l’uschè nomnà «Rapport Weidmann». Quel rapport priorisescha ils fabricats da trafic ils plü importants pel futur da la Svizra, es gnü fat per incumbenza dal cusglier federal Albert Rösti ed es gnü elavurà dal professer da la ETH Turich Ulrich Weidmann. Totalmaing sun gnüts evaluats i’l rapport 230 progets in tuot il pajais. Pel Grischun es be gnü classifichà sco urgiaint ün proget per üna staziun da cruschar Li Foppa da la lingia da Bernina da la Viafier retica. Quel proget es calculà cun 27 milliuns francs.

Pac temp, raps e focus

Sco cha la società da promoziun Pro Crusch da viafier alpina Terra Raetica scriva in üna comunicaziun da medias, deplorescha ella fermamaing cha’l chantun Grischun, sco eir las ulteriuras regiuns da muntogna, vegnan quasi ignoradas i’l rapport a favur da grond progets illa Bassa. Implü metta la società eir in dubi la forza expressiva dal Rapport Weidmann, causa cha quel saja tenor lur parair gnü elavurà cun pac temp, mezs finanzials e focus. Uschea vain in quel rapport eir degradà il proget per ün tunnel a Fideris, chi rinforzess l’axa da las Alps Basilea – Turich – Bozen e chi cuostess var 160 milliuns francs. Quista axa sto tenor la società da promoziun Pro Crusch da viafier alpina Terra Raetica gnir integrada illa planisaziun dal trafic naziunal sco eir illa consultaziun 2026.