A Livigno es l’atmosfera amo pac olimpica

A Livigno han lö in favrer las occurrenzas olimpicas da freestyle da skis e da snowboard. Sül muot ingio cha las sportistas ed ils sportists varan lura lur occurrenzas, vegna amo adüna fabrichà e preparà. I sun in acziun traxs e grüs. Dubis, scha tuot es fabrichà pels gös olimpics, co cha la situaziun es lura propa dürant quellas eivnas in favrer, quels sun avantman. Quai disch la Livignasca Sara Zini: «Nus eschan inchantats, ma vain eir ün pa temma, perquai cha nus nu savain propa, co chi vain.»

Dubis da nun esser pronts …

Schi’s passa actualmaing tras il cumün, nu’s vezza bler dals gös olimpics. Lung la via pel trafic sun bain binderinas dals gös, però illa via da flanar immez il cumün cun restorants ed affars, nu’s vezza amo ingüns anels olimpics. Gronds indizis pels gös olimpics sun però ils duos gronds plazzals da fabrica. Dad üna vart da la val sun eir uossa amo traxs vi dal modellar il terrain. E l’edifizi dal grond parcadi «Mottolino» cun passa 500 parcadis nun es amo fini.

… però sgürs cha tuot funcziuna

Eir schi dà dubis pro’ls Livignascs e Livignascas cha tuot saja la finala pront pels gös olimpics da quist favrer, restna optimistics cha l’infrastructura saja pronta a temp. «Nus nu savain che chi capitarà. Dubis n’haja. I nu’s sa co chi’d es dad ir tras Livigno cun tuot il travasch», disch Loretta Zini, abitanta da Livigno, ed es però listess persvasa cha a la fin gnia tuot bun.

Id es però eir cler per la glieud da Livigno chi’s perdarà ün o tschel giast dürant ils gös olimpics. Giasts chi gnissan sainza ils gös olimpics a far vacanzas in favrer. Quai disch Carlo Galli, ün abitant dad 80 ons: «Per dir la vardà nun ha Livigno dabsögn dals gös olimpics. Per esser sincer ha Livigno fingià blers giasts. Uossa han els fat quai chi’d es per mai massa grond.» Ma adonta da quai vöglia el ir a verer ils gös olimpics, però be schi nun es lura massa fraid.

La spranza cha’ls indigens e las indigenas da Livigno han, es cha las nouvas infrastructuras fabrichadas gnaran eir dovradas. Quai eir davo ils gös olimpics. I s’haja nempe eir investi blers raps ill’infrastructura dal cumün, per exaimpel in nouvas vias ed eir i’l provedimaint da sandà. Ma là haja quai fat nair dabsögn d’investir, uschea Sara Zini. «Id han fat üna buna lavur e nus sperain cha nus possan profitar eir davo ils gös olimpics da quai.