Nova acziun «Nadal per tuts»

Avon varga tschun onns han las soras Andrea ed Annalisa Cathomas da Glion instradau in’acziun caritativa e fundau per quei intent l’uniun «Nadal per tuts». La fotografa professiunala Andrea Cathomas, sustenida da sia sora, ha purschiu shootings per famiglias e gruppas. Finamira eis ei adina stau da regalar il recav dalla lavur a projects dil tierz mund, oravontut per affons e dunnas. Mintg’onn ha «Nadal per tuts» saviu rimnar denter 10’000 e 20’000 francs per circa 6 organisaziuns. «Igl ei talas da glieud che nus enconuschein persunalmein», declara Annalisa Cathomas e sia sora aschunta: «Cun nus en Svizra va ei schi bein e nus lessan dar anavos zatgei», gi Andrea Cathomas. Susteniu han ellas ovras d’agid humanitar sco Kipaki, 4africa, Keny Yetu e Solva. «Nus preferin talas cun pauca administraziun», gi Annalisa Cathomas. Uonn vegnan ellas puspei ad envidar als shootings. Cun lur uniun ein ellas denton vidlunder da preparar in’acziun aunc pli gronda: «Cun ina squadra da 30 persunas entuorn nus, e cun agid da sponsuras e sponsurs dalla regiun, organisein nus sonda proxima in lotto da beneficenza. «Tuttas entradas van a favur dallas ovras d’agid humanitar cullas qualas nus essan en contact», declaran las duas soras.