Rudolf rimna las clavs e gida

Era la secziun grischuna ha la medema finamira: Evitar accidents stradals caschunai pervia da nuncapacitad dad ir cun auto. Tarcisi Cavigelli da Siat presidiescha dapi la primavera vargada Nez Rouge Grischun. Sco quei ch’el declara alla FMR vegnan varga 40 voluntarias e voluntaris puspei en acziun sco manischunzs e disponentas. Uonn plidenta l’organisaziun caritativa l’emprema gada era per romontsch. Sil fegl sgulont e divers auters mieds san ins leger il motto dall’acziun: «Cun nus vegnas ti segir a casa». Gl’emblem ei il tschierv Rudolph cul nas tgietschen. «Nus vulein sensibilisar automobilistas ed automobilists da buca ir cun auto sch’els han buiu empau alcohol. En quella situaziun ch’ins stuess tuttina returnar a casa, dat ei pliras pusseivladads, per exempel clamar in taxi ni in confamigliar, definir ordavon tgi che va cun auto – ni nezegiar la purschida da Nez Rouge. Duront ils gis da fiasta, dils 5 da december tochen e culs 31 da december s’engaschan ils varga 40 voluntarias e voluntaris, denter quels era Tarcisi Cavigelli. Dalla sera allas 22.00 tochen la damaun allas 04.00 semetta el al guvernagl d’autos privats. Mintgamai in team da dus parta naven dalla centrala a Cuera el liug nua ch’ins ha clamau els. El local fixau surdat la persuna che vul turnar a casa la clav da siu auto ad in d’els, l’auter suonda cugl auto da Nez Rouge tochen ella destinaziun.