Il preventiv 2026 ei sut tetg

La radunonza da vischnaunca da Trun ha acceptau unanimamein il preventiv communal pigl onn 2026 il gliendisdis sera. Quel quenta cun in surpli d’expensas da rodund 70000 francs. La vischnaunca preveda da far investiziuns da netto 1,7 milliuns francs igl onn vegnent. Sco la suprastonza communala communichescha, sedat in deficit da finanziaziun dad 1,3 milliuns francs. Vischinas e vischins han decidiu da laschar il pei da taglia sco tochen dacheu sin 95%.

Tabla nera digitala

Dapi igl 1. da december 2025 dispona la vischnaunca da Trun d’ina nova plattafuorma sco tabla nera digitala per habitonts, uniuns e fatschentas. L’applicaziun «Crossiety» stat a disposiziun a tuts interessents per rinforzar la cuminonza sociala sco era per simplificar il brat d’informaziuns. Sco la suprastonza communala communichescha, ei «Crossiety» in mied d’informaziun per novitads ed occurrenzas en vischnaunca. La plattaforma porscha ad uniuns ed al commerci indigen la pusseivladad da sepresentar. Plinavon cuntegn ella ina plazza da fiera digitala per artechels e purschidas enteifer la vischnaunca.