Ina secunda procedura da cooperaziun

Per la radunonza da vischnaunca da Tujetsch dils 29 d’october 2025 ei la revisiun totala dalla planisaziun locala stada tractandada. La finamira dalla suprastonza communala era da suttametter ella alla votaziun all’urna da dumengia vargada, ils 30 da november 2025. Aschi lunsch eis ei denton buca vegniu. Vischinas e vischins ein buca entrai ella deliberaziun dalla revisiun, aschia ch’il termin da votaziun ei curdaus.

Buca spitgau quella decisiun

«Sin fundament da quei conclus instradein nus ina secunda procedura da cooperaziun il fevrer. La finamira dalla suprastonza communala ei da presentar la fatschenta ad ina radunonza da vischnaunca la primavera aschia ch’ella savess vegnir all’urna il matg 2026», di il president communal Martin Cavegn e declara: «La decisiun dalla radunonza communala la fin d’october havein nus buca spitgau en quella fuorma, schegie che nus havevan indezis ch’ei detti opposiziun.» El rom dalla secunda procedura da cooperaziun publica vegnan ils documents publicai ch’ein vegni presentai el messadi alla radunonza communala. «Mintgina e mintgin che giavischa midadas sa inoltrar quellas, pia buca mo quels che han opponiu alla radunonza da vischnaunca. Probabel vegn bein enqualin che s’accordava culla revisiun a s’annunziar cun ses giavischs, damai ch’el vesa ch’auters vegnan era a far quei», di Martin Cavegn.

Ch’ins hagi buca fatg ina secunda procedura da consultaziun suenter l’emprema, hagi in motiv special pil president communal: «Nus vein buca viu la necessitad, damai che nus havevan paucas resalvas e giavischs.» Alla radunonza da vischnaunca dils 29 d’october 2025 han dus votums procurau che la fatschenta ei buca vegnida tractada e ch’igl ei vegniu pretendiu ina secunda procedura da cooperaziun.

Ina cumissiun independenta

Sco gia tier l’emprema procedura da cooperaziun vegn ina cumissiun independenta a giudicar ils giavischs che vegnan allura ofniai el rom da quella secunda procedura da cooperaziun. La cumissiun consista da persunas d’ordeifer. Il messadi per mauns dalla radunonza communala, respectiv dalla votaziun all’urna, duei allura risguardar las midadas aschilunsch che quellas ein pusseivlas da realisar. «Gest tenor situaziun vegnin nus a formular in niev messadi», di Martin Cavegn.

In’ulteriura prexaminaziun tiel Cantun ei buca previda avon la decisiun dil suveran. «Nus havein denter tschun e sis hectaras da memia terren en zona da baghegiar. Ina reducziun ei indispensabla e quella sminuaziun ei era per la suprastonza communala fetg malemperneivla», puntuescha il president communal. Duessi il suveran dar suatientscha a memia biars giavischs, savessi ei lu esser ch’il Cantun accepti buca la revisiun. «Igl ei ina sfida da procurar per ina soluziun che cuntenta aschi bein ils proprietaris da terren sco la regenza grischuna», vegnan la planisadra Esther Casanova ed il president communal citai el protocol dalla radunonza da vischnaunca digl october. Vegnessi la revisiun refusada dil Cantun, stuessi la vischnaunca da Tujetsch ir suls cudischs danovamein. «Fuss quei il cass, stuess ina buna part dalla revisiun dalla planisaziun locala vegnir instradada da niev», di Martin Cavegn. La vischnaunca da Tujetsch ei vid quella dapi igl onn 2019.