Per mantigneir igl parlamaint

Ier dumengia on votants e votantas digl cumegn da Vaz er gia da decider all’urna arisguard treis votaziuns communalas. La votaziun cunter u per mantigneir igl parlamaint da cumegn ò las davosas emdas caschuno per bler material da discussiun e neidas scretgas èn ainten la gasetta regiunala «Novitats» er numerousas brevs da lectours, pertutgont la dismessa u igl mantignamaint digl parlamaint. Realitad è tgi neidas scretgas èn per en po daples brevs da lectours, cun la supplica da votar da gio betg renunztgier agl cunsegl communal. Digl reminent ò igl suveran digl cumegn da Vaz gio gia igl 2006 ena votaziun per u cunter igl cunsegl communal e lò decidia cun 454 cunter 441 vouschs da betg dismetter chel gremi politic e superiour.

Angal 22 cedels veids

Ossa siva dad ier dumengia è cler tgi aint igl avigneir ò igl cumegn da Vaz venavant en parlamaint cun decider igl suveran da mantigneir chel. La decisiun a favour digl cunsegl communal è crudada cun 499 cunter 422 vouschs per betg renunztgier agl cunsegl communal. La suprastanza communala digl pi grond cumegn surmiran veva sustignia l’iniziativa per dismetter igl parlamaint, dantant tgi igl cunsegl communal era per mantigneir er aint igl futur chel gremi politic ed igl pi ot digl cumegn. La participaziun è stada tar 55,5 %, vot deir tgi da total 1770 votants e votantas èn 964 omens e donnas stos all’urna. Digls 964 cedels da votar eran 921 valevels, 22 veids e 21 nunvalabels.

«Igl resultat è ena surpresa»

Gian-Reto Paterlini, igl iniziant principal dall’iniziativa per renunztgier agl cunsegl communal, ò detg anvers la FMR igl suandont: «Igl resultat è per me bagn pitost ena surpresa. Igl suveran ò damai decidia da cuntinuar cugl sistem politic existent, cun aveir er aint igl futur en parlamaint. Blers votants e bleras votantas varon er gia l’impressiun tgi sainza igl cunsegl communal vignigl a dar per onn plessas radunanzas communalas e gist chegl savess er esser sto decisiv a favour digl cunsegl communal. Migler fiss eventualmaintg sto da preschentar cun la votaziun gist er la constituziun da cumegn scu tg’ella vess vasia or sainza parlamaint. Igl è er uscheia tgi tranter igls votants e las votantas eran er bleras persungas tg’on eneda appartignia agl cunsegl communal, uscheia tgi bleras vouschs per mantigneir igl cunsegl communal èn er neidas da chella vart.»

Pi gugent en parlamaint tgi daples radunanzas communalas

Michele Vitali, anc anfignen alla fegn da chest onn president digl parlamaint ed uscheia er igl pi «ot» da Vaz, ò s’exprimia suandontamaintg anvers la FMR cun piglier cunaschientscha digl resultat: «Sa tgapescha tg’ia sung fitg cuntaint cugl resultat er cun esser da mia vista chel tuttegna cler. Igls promotours per dismetter igl cunsegl communal on fatg pulita propaganda per l’iniziativa e tuttegna è betg reuschia ad els da gudagner igl cumbat da votaziun. Igl resultat positiv è er en mussamaint da fidanza anvers igl parlamaint sez. Siva dalla davosa radunanza communala varo er ena bunga part digl suveran panso tgi seia migler d’aveir en parlamaint tgi d’aveir dad eir daple a radunanzas communalas tgi portan tuttegna betg igl spitgia.»

Las dus ulteriouras votaziuns all’urna on votants e votantas accepto. Igl credit dad 1,8 milliuns francs per ramplazzar igl indrez da sfardantar igl glatsch digl Center da sport Dieschen è nia accepto cun 821 cunter 104 vouschs. Da separar e manar las ovras communalas autonom ed independent dall’administraziun da cumegn antras en’instituziun da dretg public ò igl suveran da Vaz accepto pi stgers cun 555 cunter 346 vouschs.