Tschupi e pigniel
Ferton ch’ina candeila suenter l’autra vegn envidada sil tschupi d’advent ed ina porta dil calender d’advent suenter l’autra astga vegnir aviarta, s’avischina la fiasta da Nadal cun ried.
Mintg’onn da niev segrittenteschel jeu denton ch’ins vesa adina pli savens advent e Nadal en ina. Buca mo sin Facebook ed Instagram, na era tier mes vischins. Enstagl d’entscheiver cugl advent e ses usits e silsuenter prender a mauns la decoraziun dil pigniel da Nadal, vegn il pigniel decoraus gia ditg avon la fiasta per propi. Persuenter setschenta il pigniel aunc egl onn veder avon casa, direct el rumien (biologic) ni puspei si surcombras. Pia finiu cul ciclus classic: Igl emprem il tschupi d’advent ed allura il pigniel che stat en stiva tochen la fiasta da Buania.
Era en stizuns in semegliont maletg: La vendita speciala che biars desidereschan aschi fervent sco ils affons il Bambin e che vegneva lantschada suenter Daniev, entscheiva ussa gia il december. Cun la consequenza ch’il Nadal da consum entscheiva gia baul igl atun. Predestinau per la lamentaschun annuala e generala: Mintg’onn pli e pli baul.
Il spitgar ei para ord moda ed il mund ei ord cadeina – ina gada dapli. Schegie che pazienzia e spitgar ei era buc adina mia fermezia – tier il ritmus d’advent e Nadal enconuschel jeu denton buca spass.
Ferton che miu partenari decorass il pigniel da Nadal era gia uss, smachel jeu sils freins. Aschia serepeta la discussiun mintg’onn: Cu astgel jeu decorar il pigniel? E daco buca gia uss? Mo las discussiuns vegnan mintga december pli e pli cuortas. Ferton ch’el argumentescha cun sentiments da glamour e ch’in pigniel decorau seigi bi, ein mes arguments meins romantics. Jeu declarel tuttina ad el mintg’onn da niev il senn davos igl advent cul tschupi e silsuenter cul pigniel. La fin dils quens seigi quei ciclus buca senza senn. Ed era sche quels arguments ein a prema vesta meins glamurus e per el palpabels – els portan fretg.
Tut quei demuossa denton che la capientscha per quei che la societad fa onn per onn entuorn quest temps preparativ ed allura festiv ei daferton pauc presenta ella schientscha collectiva. E co vulan ins pomai haver pazienzia, sch’ins sa buca daco ch’ins fa enzatgei e pertgei ch’ei vegn fatg?
Aschia ha el era uonn buca mo per l’emprema gada ina stalla da Nadal – en sesez il center da tut – mobein: il pigniel ei aunc buca staus tema. Aunc buc. Tochen allura glischan las candeilas sil tschupi d’advent.
Gust da leger dapli?