Ina lieur d’argient pil «paravent»

Dapi 2018 organisescha Hochparterre, la revista svizra d’architectura, planisaziun e design, ina gronda concurrenza cul num «Die Besten». Ella premiescha prestaziuns ellas disciplinas architectura, design ed architectura da cuntrada. Ella disciplina dil design ei Carlo Clopath da Trin Mulin in dils megliers dil 2025. El ha gudignau ina lieur d’argient dil design per siu product cul num «Meander» (mira scaffa/box) . Ina giuria da tschun expertas ed experts ha examinau e classau sia lavur denter quellas da biebein 70 autras.

Il «paravent» franzos

Margis ei Carlo Clopath staus a Turitg alla fiasta da premiaziun. El ei turnaus a casa cun ina trofea prestigiusa, la lieur d’argient da Hochparterre. El sectur da design ei quella distincziun da cumparegliar culs puncts e steilas da Gault Millau e Michelin ella gastronomia. El Museum per creaziun da Turitg ha la giuria surdau al designer da Trin Mulin il secund-meglier premi dalla sera. La lieur d’aur ella categoria design han Naomi Eggli e Dagna Salwa gudignau cul tricot «EMpower» ch’ellas han scaffiu pil campiunadi europeic da ballapei. Igl ei il camischut sdrimau ellas colurs violet/clarverd cun emblems che rendan attent all’egualitad.

Carlo Clopath ha gudignau la lieur d’argient per ina prestaziun ch’ei cumbinada cugl inschign manual e las resursas regenerablas. El ha creau ina preit movibla, ina mobiglia ch’ei era enconuschenta cul num franzos «paravent». Element central dalla mobiglia ei in’aissa sturschida dalla dimensiun 1400x250x45 mm. Alla FMR ha il designer affirmau: «Igl ei ina aissa da lenn-pégn senza roma e rascha». Ch’el ha elegiu lenn-pégn da siu territori ei il messadi central dil product. Plontas dallas muntognas s’adatteschien il meglier per storscher pli tard las aissas, perquei ch’il lenn alv dil pégn creschi plaun e ruasseivel, declara il designer.

Cun pressiun e cun vapur

Silmeins tschun elements, respectiv tschun aissas sturschidas, drova ei per ch’il paravent stetti bein sidretg e seigi stabils. Mintgina ei 1.40 meters liunga, 25 centimeters lada e 40 millimeters satella. Per tgei san ins duvrar in tal product? Carlo Clopath numna exempels: «Per separar cuschina e stiva, per scaffir in spazi provisoric, ina stanza da durmir ni in biro». Il product Menader ei buca mo ina preit movibla funcziunala, mobein era in bi element d’ina habitaziun ni d’in biro. Ina preit da lenn estetica che separa buca memia anetg e criu.

Co storscha el insumma las aissas e co tegnan quellas ensemen? L’emprema damonda rispunda Carlo Clopath aschia: «En in emprem pass splauna il scrinari da Trin ellas sils quater millimeters. Silsuenter vegnan mintgamai duas aissas semplamein formadas cun pressiun» In’autra mobiglia da lenn, la sutga senza peis ch’el ha sviluppau producescha il designer artisanal cun agid da vapur. Igl ei in process special che drova experientscha, savida ed inschign. Per quella procedura collavura Carlo Clopath cun in luvratori specialisau el cantun Argovia.

Ei resta product artisanal

En cumparegliaziun cun auters products ch’el hagi sviluppau, seigi la preit movibla in sempel project, tradescha il sviluppader da Trin Mulin. En connex cul paravent ei la damonda aunc aviarta co las minimalmein tschun aissas che dattan ina preit ni in paravent onduladau, setegnan insumma ensemen. Quella part essenziala ha Carlo Clopath sligiau suandontamein: «Ils singuls moduls, respectiv aissas, selaian metter ensemen tras semplas cavadiras d’omisduas varts.» Igl ei in sistem semegliont als tablegiai ch’ins empuneva aissa per aissa. Per garantir la stabilitad e la qualitad dil product ha el perfecziunau il sistem dallas cavadiras.

Sco Carlo Clopath declara vinavon alla FMR, sa el aunc buca producir sia mobiglia «Meander» en seria. Il designer ha sviluppau, creau e registrau il product, quel secumprova ed ha retschiert emprema bunas notas. Il paravent vegn el era a producir egl avegnir mo artisanalmein – perquei che l’industria ha bregias da luvrar cun materials natirals. Il designer motivescha ei aschia: „Mintg’aissa ei adina in tec autra ed ei drova ils egls e mauns dil mistergner“.