Motivaziun, concurrenza, ma era sustegn
Fabienne e Roman Alder da Puntraschigna, Noe ed Isai Näff da Sent u Nadja e Marina Kälin da San Murezzan. Els n’èn betg mo fragliuns engiadinais, els tuts han era decidì da far carriera da passlung.
Igl è sco da dir: Sch’il frar u la sora gronda va questa via lura, lura fatsch jau il medem. Ma savens è il sport da passlung er in sport da famiglia, in sport che vegn savens dà vinavant dals geniturs. Uschia è quai pia era stà tar las famiglias engiadinaisas Fabienne (22) e Roman Alder (20), Noe (22) ed Isai Näff (20) e Nadja (24) e Marina Kälin (22).
Blers avantatgs
Ils fragliuns profitan en emprima lingia fitg in da l’auter, els motiveschan dentant er in l’auter e pon era sustegnair in l’auter. Savens vegn era trenà ensemen e magari èsi er ina tscherta concurrenza, ina sauna concurrenza che porta mintgin/a vinavant sin la via al sport da profi. La finala è il passlung però in sport singul, mintgin sto ir sia atgna via. La finamira, quella resta dentant tar tuts la medema, da fitgar pe en la cuppa mundiala ed avair success, gudagnar titels e medaglias. Ed il siemi da mintga sportist: dastgar sa participar a gieus olimpics.
Ils fragliuns Roman e Fabienne Alder
Ils fragliuns Fabienne (22) e Roman Alder (20) da Puntraschigna han omadus entschet baud da far sport ed esser activs. «Nus avain l’entir temp fatg sport cun la famiglia. Jau hai era fatg in pau judo e dà ballape, dentant la sora gronda era adina fitg buna en passlung e lura hai jau era ditg: ‹Pertge betg?›», ha raquintà Roman Alder vers RTR. La sora na saja dentant betg il sulet motiv ch’el saja sa decidì per quella via. Il bab haja numnadamain gia fatg passlung e tenor Roman Alder saja quai fitg bel da far passlung a Puntraschigna sper la Val Roseg. Uschia era quai pia adina sia passiun.
Els hajan adina pudì profitar in da l’auter, e quai er anc oz, ha ditg Fabienne Alder: «Tar trenaments na sun jau betg uschè sperta sco mes frar. Nus pudain dentant tschantschar davart tut, sch’insatge na va betg, sch’ins è gnervus u era davart ils skis. Jau sun cuntenta ch’i dat insatgi che sa insatge davart quest urden, mintgatant schizunt dapli che jau.»
Ils fragliuns Alder han dà avant bun in onn lur debut en la cuppa mundiala tar la cursa da sprint a Tavau. Roman Alder ha en quella cursa perfin gudagnà ses emprims puncts ed è uschia vegnì selecziunà per il campiunadi mundial il favrer a Trondheim. Il pli grond siemi dad omadus è da pudair sa participar ina giada als gieus olimpics. (rtr/fmr)
Las soras Nadja e Marina Kälin
Nadja Kälin è la veglia da las duas soras ed è cun ses 24 onns gia s’etablida en la cuppa mundiala. Marina Kälin è cun 22 onns dentant gest en ils fastizs da la sora gronda. Che las duas soras da San Murezzan han chattà la via tar il passlung, engrazian ellas als geniturs. «Els han adina prendì cun nus sin ils skis u sin ils skis da passlung ed uschia è quai lura sa sviluppà», ha declerà Nadja Kälin vers RTR.
Ellas èn creschidas si cun blers sports, dentant la finala sa decididas per ils skis stretgs da passlung. Ch’ellas èn idas la medema via, haja da blers avantatgs, ha ditg Nadja Kälin: «En il trenament è quai bun dad avair ina persuna che motivescha e sche insatge na va betg uschè bain, è mia sora segir ina persuna cun la quala jau poss tschantschar surlonder.»
Tschantschar pon ellas bler, pertge ellas treneschan er il bler ensemen, ha ditg Marina Kälin: «Nus empruvain adina da trenar regularmain ensemen. I dependa adina tgi che fa tge e tgi che dovra tge, ma a Tavau trenain nus segir la mesadad dal temp ensemen.»
Il pli grond siemi da las soras è natiralmain da daventar la meglra curridra da passlung dal mund, gudagnar cursas da la cuppa mundiala e medaglias olimpicas. En in pèr mais va quai forsa en vigur tar ils gieus olimpics en la Val di Fiemme. (rtr/fmr)
Ils frars Noe ed Isai Näff
Noe Näff ha 22 onns ed Isai Näff 20 onns. Malgrà ch’ils dus frars da Sent èn dus onns in ord l’auter sa sentan els sco schumellins. «Nossa tatta na vegn betg da tegnair nus in ord l’auter. Nus essan adina qua in per l’auter. Nus essan prest sco ina persuna.» Quai ha raquintà Isai Näff vers RTR. Ma ses frar grond saja plitost quel che tira il char durant ch’el profiteschia.
Isai Näff ha vis tge ch’è pussaivel, pertge ses frar grond ha savì participar l’emprima giada ad in campiunadi dals gronds e quai cun success. Tar sia premiera il favrer a Trondheim è Noe Näff vegnì ventgavel en la categoria da sprint. Isai Näff è persuenter quel che ha da giuven gì pli bler success. Tar el pendan vid la paraid gia duas medaglias. Ina d’argient ed ina da bronz, gudagnadas tar ils campiunadis mundials dals juniors.
Noe ed Isai Näff èn anc a l’entschatta da lur carrieras, vulan dentant propi fitgar pe en la cuppa mundiala, ma ils dus giuvens siemian dapli: gudagnar in di ina medaglia a gieus olimpics. «Quai avain nus gia da pitschens gì sco siemi: Ir en il team sprint ensemen e gudagnar ina medaglia per la Svizra», ha declerà Noe Näff. (rtr/fmr)
Gust da leger dapli?