Zernez prevezza ün guadogn per l’on da gestiun 2026

La radunanza cumünala da Zernez ha fat bun l’eivna passada il preventiv 2026 unanimamaing. Il quint da success prevezza pro entradas e sortidas da bundant 22 milliuns francs ün guadogn da 365 ​643 francs. Inavant resta il pè d’impostas sco fin qua.

51 votantas e votants s’han radunats in marcurdi saira per l’ultima radunanza cumünala da l’on in l’auditori dal Parc Naziunal. Els han fat bun i’l rom dal preventiv d’investiziuns divers credits d’investiziun, tanter da quels 1,5 milliuns francs pel rimplazzamaint da la Punt Madinas chi traversa l’En in vicinanza dal camping ed as rechatta in ün stadi desolat. Raduond la mità dals cuosts, dimena 750 000 francs, dess gnir contribuida dal Chantun. La punt es planisada da fabrichar in möd cuvert, in lain sün fundamainta da beton.

Raduond 520 000 francs dess cuostar la sanaziun dals duos implants da paracullas pro’l tir da schaibgias. Quist oblig as basa sülla revisiun da la ledscha federala davart la protecziun da l’ambiaint, in vigur daspö il cumanzamaint da quist on. Las lavurs chi ston gnir executadas fin la fin da l’on 2026 vegnan subvenziunadas cun 290 000 francs.

Blers oters credits

Oters credits d’investiziuns cun imports remarchabels pertoccan la sanaziun dals filters d’aua i’l Bogn da famiglia per 105 000 francs, ün nouv bypass i’l provedimaint d’aua da baiver sülla lingia principala tanter la funtana Sarsura ed il reservuar Vallatscha per 150 000 francs, duos nouvs idrants d’aua sün l’areal Sosa per 90 000 francs net opür 150 000 francs per ün sistem da survaglianza e manisamaint d’implants dal EW Zernez. Eir ad ün credit supplementar ha il suveran dit SCHI unanimamaing. Quel importa 145 000 francs e vain dovrà dasper ils 350 000 francs dal credit oriund per sanar l’infrastructura publica sülla via chi maina sur l’Ospiz. Ulteriurs 215 000 francs vegnan dovrats pel spostamaint da l’infrastructura publica chi traversa üna parcella d’ün proget da fabrica süls Muots a Brail, subit cha’l proget da fabrica vain inchaminà.

Previs ün guadogn pel 2026

Il preventiv 2026 dal quint da success prevezza sortidas da s-chars 22,5 ed entradas da bundant 22,8 milliuns francs, amortisaziuns dad 1,4 milliuns ed investiziuns nettas da s-chars 2,7 milliuns francs. Da quai resulta ün guadogn previs da 365 643 francs ed ün cash-flow dad 1,8 milliuns francs. Il preventiv 2026 muossa, cha cun 3,3 milliuns francs chaschuna il repart scolaziun 32 % e cun quai il plü grond baccun dals cuosts dal cumün. I seguan cun 1,44 milliuns l’administraziun (14 %) e cun 1,42 milliuns francs la sandà (13 %). Il pè d’impostas cumünal resta tenor decret dal suveran e sco proponü da la suprastanza cumünala pro 84 % da l’imposta chantunala.

Quatter cunvegnas da prestaziun

Implü han las votantas ed ils votants approvà la renovaziun da quatter cunvegnas da prestaziun culla Regiun Engiadina Bassa/Val Müstair a partir dals 1. schner 2026 e pella dürada dad ulteriurs tschinch ons. Quai concerna la scoula da chant e musica, il management regiunal, il post regiunal d’integraziun sco eir, in globo, la promoziun da cultura, il permiss per lottarias, la fuormaziun, la chüra d’uffants e la politica da giuventüna e sport.

Üna nouva cunvegna da prestaziun regla a partir da l’on nouv l’integraziun da l’Uffizi fundiari Engiadina Bassa/Val Müstair illa structura da la regiun. Eir a quista cunvegna ha il suveran da Zernez dit SCHI unanimamaing, cumbinà culla decisiun da schoglier il circul da register fundiari d’Engiadina Bassa existent sülla fin da l’on curraint.

Implü ha il suveran approvà ün contrat da concessiun pel dret d’aua da fuond a favur da la Clinica Holistica Engiadina SA per pudair realisar ün s-chodamaint d’aua da fuond per l’anteriur Hotel Steinbock. Eir dit SCHI ha il suveran per finir ad ün credit d’investiziun da 210 000 francs per la cumprita definitiva da la maschina da far loipas. Quella d’eira gnüda fittada dürant l’ultima stagiun d’inviern i’l rom d’ün contrat da fittanza-cumprita.

Agrischa darcheu a Zernez

Avant co invidar a las preschaintas ed als preschaints ad ün aperitiv ha il capo cumünal, Domenic Toutsch, infuormà, cha la suprastanza haja decis d’esser cul logo da Zernez uschedit «Kopfsponsor» da la passlunghista indigena Giuliana Werro. Implü ha’l ingrazchà als collavuraturs partents ill’economia privata, respectivamaing in pensiun, Carlo Bott ed Erich Sulser per lur collavuraziun da fin qua e fat attent sün duos termins importants: als 25 e 26 avrigl ha lö la faira chantunala d’agricultura Agrischa darcheu a Zernez ed als 27 settember ed als 29 november han lö il prüm ed eventualmaing il seguond scrutin da las tschernas pels gremis cumünals pella perioda d’uffizi 2027 fin 2030.