Il cussegl da vischnaunca ha ina presidenta

En sia davosa seduta da quest onn, salvada el Center Fontauna, ha il cussegl da vischnaunca da Mustér tractau ina nova reglamentaziun per la biblioteca Mustér e contuorn en fuorma d’in’ordinaziun. El ha aboliu il regulativ vegl. Sco commembras e commembers dalla cumissiun parlamentara da finanzas pils proxims treis onns ha il cussegl da vischnaunca eligiu Silvia Bucheli-Caduff, Remo Huonder ed Admir Jasarevic. La cumissiun da finanzas sefatschenta activamein dalla preparaziun dils preventivs dils proxims treis onns. Plinavon ha il parlament communal priu enconuschientscha dall’agenda da termins e fatschentas digl onn 2026.

In niev tgamun pil cussegl

Sco presidenta dil cussegl da vischnaunca pigl onn 2026 ha il parlament eligiu la vicepresidenta Theres Burri Gadola. Sco niev vicepresident vegn cusseglier Rafael Maissen tscharnius. Igl onn 2025 ei il cussegl da vischnaunca vegnius presidiaus d’Adrian Flepp. Sco niev vicepresident communal vegn Paul Flurin Schmid eligius. Sco la suprastonza communala scriva en ina communicaziun als mieds da massa, eis ella sedecidida per ina rotaziun dil vicepresidi communal naven digl onn vegnent. Consequentamein vegn eligiu mintg’onn ina nova vicepresidenta ni in niev vicepresident dalla suprastonza communala. (cdm/fmr)