Gronda solidaritad per «la buteia»

Ples onns ò la Societad da consum Savognin e conturn mano la filiala dalla buteia Prima a Salouf. La sviouta da stgers en mez milliun francs ò igls davos onns simplamaintg betg tanschia per curveir igls costs da menaschi e da persunal. La mancanza da persunal e la situaziun finanziala cun en deficit annual da 55 000 francs n’èn per la Societad da consum Savognin e conturn betg ple stadas surpurtablas.

Spert egn concept pigl nov negozi

Cun la fegn d’otgover 2025 ò la buteia Prima a Salouf saro las sias portas per adegna. La populaziun da Salouf, dantant er plessas persungas tg’on a Salouf en’abitaziun da vacanzas u er ena tgesa da vacanzas, ò chella decisiun da renunztgier aint igl avigneir alla buteia Prima betg plaschia. Fundada è neida an curt taimp ena gruppa d’interess ed a madem mument la Societad cooperativa Pro Salouf, cun la fegnameira principala da cattar ena soluziun per mantigneir an vischnanca ena buteia. Bagnspert è igl concept pigl nov negozi sto sen meisa, nia preschento alla suprastanza communala digl cumegn da Surses ed er gist igl plan da gestiun digl nov negozi per Salouf «la buteia».

Digl concept e digl plan da gestiun è la suprastanza digl cumegn da Surses sto persvadia ed ella è er stada pronta da sustigneir l’ideia cun renunztgier per treis onns agl tschains dallas localitads dalla buteia, tg’èn an possess digl cumegn da Surses.

Radond 200 commembers e commembras

Alla testa dalla Societad cooperativa Pro Salouf stat Gian Sonder. L’organisaziun è alloura er l’inizianta principala digl nov negozi «la buteia». Graztga a blera lavour voluntaria ed er cun surdar l’egna u l’otra lavour ad interpresas indigenas èn las localitads neidas renovadas las davosas emdas e sa preschaintan ossa an en nov vistgia – en vistgia ampernevel, cler e frestg.

Da preschaint ò la Societad cooperativa Pro Salouf radond 200 commembers e commembras tg’èn a madem mument er societaris e societarias digl affar «la buteia». La commembranza dalla societad costa 200 francs per persunga. Igl è naturalmaintg er pussebel da signier ples documaints da commembranza pigl prietsch da 200 francs.

Vers 1200 products

Igl anteriour negozi Prima a Salouf ò ossa damai retschet nova veta e sa preschainta scu «la buteia» an en ambiaint conform agl taimp. Abitants ed abitantas da Salouf on la caschung da cumprar products da mintgade. La paletta da products regiunals è er fitg vasta, cun esser pussebel da cumprar tgern, mêl, tiffels, biscuits e lugargias scu er products fittos e pronts per cuschinar. Flours ed artisanat indigen mantgan alloura er betg e sa tgapescha pang da Salouf. Da cumprar dattigl vers 1200 products, damai ena bela purscheida per ena buteia da vischnanca.

Ena spezialitad: La buteia è averta durant 24 ouras e durant set deis l’emda, graztga ad en schinumno sistem da «self checkout». Antrar è pussebel cun la carta da banca e cun chella er gist paer la roba cumprada. Durant tschertas ouras defineidas è igl negozi er tgiro e mano. Manadra dalla buteia è Lyset Sonder e sustigneida vign ella da Monika Demarmels. La roba reteira «la buteia» da blers producents e bleras producentas dalla regiun e tras en partenari da bio tgi furnescha negozis e buteias.

Igl interess per l’avertura digl nov negozi è venderde passo sto immens grond. E da sperar è tgi chel interess resta er schi sa tracta da risguardar e sustigneir igl affar «la buteia».